Ацы куыст цæуы Октябрьскæйы скъолайы
Æвзæрстыты агъоммæ программæтæ, агитацион куыст æмæ æндæр хъæугæ мадзæлттæ сæххæст кæнын хъæуы, скъолайы президенты æвзаргæйæ. Ацы куыст цæуы Октябрьскæйы скъолайы. Хъæлæс кæныны участочы уыдысты республикæйы æвзарæн къамисы уæнгтæ дæр. Уыцы хъæппæрис разынд скъолайы директоры хæдивæг Бататы Виолеттæмæ. Ахуырдзауты зæрдæмæ ногдзинад тынг фæцыд. Зæрдиагæй æххæст кæнынц æппæт домæнтæ. Чехойты Фатимæ радзурдзæн бæстондæр.
Куыд суæвæн ис президент? Ацы фарстæн дзуапп зоны 9-æм къласы ахуыргæнинаг Плиты Аидæ. Октябрьскæйы 2-æм скъолайы ахуырдзау у ахуыргæнæдоны парламенты президент. Афæдзы размæ йæ равзæрстой хъæлæсгæнджыты фылдæр хай. Фыццаг æмгъуыдмæ æппæт фæндтæ сæххæст кæнын нæ бантыст. Ныр президенты бынатмæ æвзæрстыты архайынц 7 кандидаты. Плиты Аидæйы ныхæстæм гæсгæ, уыдысты фылдæр. Иутæн æвзæр бæрæггæнæнты тыххæй нæй ахуыргæнæдоны ахæм бæрнон хæстæ æххæст кæнын, иннæтæ та дебатты хатдзæгты тыххæй систой сæ кандидатурæтæ.
Æвзæрстытæ сарæзтой скъоладзаутæ сæхæдæг. Ахуыргæнджытæн хъæлæс кæныны бар нæ уыд – кастысты иуварсæй. Сæ ныхæстæм гæсгæ, æвзæрстытæ дзуапп лæвæрдтой, бæстæйы цы домæнтæ ис хъæлæс кæнынæн, уыдонæн. Кандидаттимæ базонгæ уæвынæн бацæттæ кодтой информацион стенд. Ахуырдзауты парламенты президенты бынатмæ кандидаттæ бакуыстой æвзæрстыты размæйы программæтыл. Алкæцыйыдæр дзы фыст уыдысты, скъолайы уавæртæ фæхуыздæр кæнынæн мадзæлттæ. Иуты фæнды сног кæнын музей, иннæты хъуыдымæ гæсгæ та, хорз уаид вай-файы фæзтæ саразын. Æвзарæн хайад бабæрæг кодтой республикæйы æвзарæн къамисы минæвæрттæ – стыр аргъ скодтой мадзалæн: закъонхæлдтытæ нæ раиртæстой.
Æвзæрстытæ саразыны хъæппæрис сæвзæрд скъолайы директоры хæдивæг хъомыладон куысты Бататы Виолеттæмæ. Йæ ныхæстæм гæсгæ, ахуырдзаутæн цымыдисаг уыд мадзалы бацархайын. Бæстæзонынады урочыты лæмбынæг дзырдтой хъæлæс кæныны процедурæйы тыххæй. Ныр сæ зонындзинæдтæй спайда кодтой, скъолайы æвзарæн къамисы уæнгтæ куы систы, уæд. Кастысты, закъонхæлдтытæ æрцыдысты æви нæ, уымæ, нымадтой æвзарджыты хъæлæстæ.
Скъоладзауты парламенты президент æвзæрст цæуы иу азмæ. Хъæлæсгæнджытæ сты хистæр кълæсты ахуырдзаутæ. Мадзал саразджытæ фæнысан кодтой, æвзæрстыты алы архайæг дæр стыр бæрнондзинад кæй равдыста, уый.
