Æрбахуыдтой йæм 25 адæймаджы – æрыгон педагогты æмæ Цæгат Ирыстоны паддзахадон университеты ирон филологийы факультеты студентты
Ахуырады кусджыты зонындзинæдтæ фылдæргæнæн республикон институты арæзт æрцыд педагогон семинар ирон æвзаджы ахуыргæнджытæн. Æрбахуыдтой йæм 25 адæймаджы – æрыгон педагогты æмæ Цæгат Ирыстоны паддзахадон университеты ирон филологийы факультеты студентты. Семæ куыстой фæлтæрдджын специалисттæ – Дзæуджыхъæуы 7-æм скъолайы ахуыргæнджытæ. Фембæлд арæзт уыд 2 хайæ. Коучинг у, ахуыргæнæджы æмæ зондамонæджы аз æххæстгæнгæйæ, цы мадзæлттæ нысангонд æрцыд, уыдонæй иу.
Майрæмыхъуаты Фатимæ, ахуырады кусджыты зонындзинæдтæ фылдæргæнæн институты ирон æвзаг æмæ литературæйы кафедрæйы сæргълæууæг: «Уыцы азы фæлгæты нæ институт аразы бирæ мадзæлттæ ахуыргæнджытæн. Фæнды нæ, цæмæй ацы аз ныууадза арф фæд ахуыргæнджыты куысты, фæзына сыл хуыздæрырдæм. Уыцы мадзæлттæй иу у – педагогон коучинг. Афтæ йæ схуыдтам. Кæй зæгъын æй хъæуы, стыр æххуыс фæуыдзысты, абон цы куысты хуызтæ феной, уыдон. Ахæм куыст кæнæм фыццаг хатт. Уымæн æмæ иннæ хæттыты дæр практикон куыстытæ фæкæнæм, фæлæ, цæмæй сæхицæй исты райсæм, исты продукт бацæттæ кæной, уый хатгай къухы нæ бафты. Абон та уыцы нысан ис нæ размæ æвæрд».
