Аивадуарзджыты размæ рахаста спектакль «Мой бедный Марат»
Евгенийы Вахтанговы номыл Академион уырыссаг театр йæ сезон сæхгæдта премьерæйæ. Аивадуарзджыты размæ рахаста спектакль «Мой бедный Марат». Алкæйы зæрдæмæ дæр фæндаг чи ссардзæн, ахæм цымыдисаг истори. Дзурæг у æртæ æрыгон адæймаджы хъысмæтыл. Сæхиуыл бавзæрстой Фыдыбæстæйы Стыр хæсты цаутæ, федтой Ленинграды блокадæ. Спектакль раздæр дæр уыди ирыстойнаг сценæйы. Уый уыд 50 азы размæ. Ныр та режссер Александра Тэйнина сфæнд кодта пьесæмæ йæхи цæстæнгас равдисын. Бæлвырддæр радзурдзæн Фидараты Маринæ.
Дыууæ æнахъом сывæллоны, æмæ баззадысты æнæницæмæй. Марат æмæ Ликæ. Дыууæйæн дæр сæ хъысмæт аразæг у Фыдыбæстæйы Стыр хæст. Кæрæдзиуыл фембæлдысты, æхстыты бын чи фæци, ахæм хæдзары. Иумæйаг зындзинад сæ кæрæдзимæ æрбангомдæр кодта, æмæ ссардтой уарзондзинад. Разæй та зын æмæ цæлхдуртимæ фæндаг. Фæстæдæр семæ фембæлд пьесæйы иннæ хъайтар – Леонидик. Лæппу уыд лæмæгъ æмæ æххормаг. Марат æмæ йын Ликæ æвæстиатæй баххуыс кодтой. Мараты роль йæхиуыл сбарста æрыгон актер, æртыккæгæм курсы студент Александр Зафириди. Нырма уал ын у йæ фыццаг роль.
Ликæйы роль та хъазынц дыууæ актрисæйы Рæмонаты Анастасия æмæ Пагæты Маринæ. Уый тыххæй æвзæрыдысты зындзинæдтæ дæр, – зæгъы режиссер. Зæгъæм, генералон репетици ацыд дыууæ хатты. Фæлæ чызджыты хсæн сфæлдыстадон ерыс нæй. Евгений Вахтанговы номыл Уырыссаг Академион театры актрисæ Пагæты Маринæ куыд зæгъы, афтæмæй Анастасияимæ кæрæдзийæн кодтой зæрдиаг æххуыс.
Пьесæ “Мой бедный Марат” 1964-æм азы ныффыста драматург Алексей Арбузов. Уырыссаг Академион театры репертуары ныридæгæн дæр уыди – ивгъуыд æнусы æвдайæм азты. Æмæ ныр 50 азы фæстæ пьесæмæ ногæй раздæхтой се ргом. Спектакль сæвæрдта режиссер Александра Тэйнина.
Спектаклы премьерæ æрцыд сезон сæхгæныны рæстæгмæ. Равдыстой йæ ивгъуыд фæлладуадзæн бонты. Кæй зæгъын æй хъæуы, ног сезоны дæр аивадуарзджытæ ацы постановкæ фендзысты. Уымæн æмæ алы спектакль театрдзаутæн æмæ актертæн дæр у ахсджиаг.
