Кадджын мадзалы архайдта ахуырады æмæ наукæйы министр Алыбекты Эллæ
Намысы музей, точка роста æмæ ног кабинеттæ. Архонкæйы 1-æм скъола байгом бындурон цалцæджы фæстæ. Кадджын мадзалы архайдта ахуырады æмæ наукæйы министр Алыбекты Эллæ. Скъолайы бæстыхай арæзт æрцыди 120 азы размæ. Уæдæй нырмæ иу æм базылдысты æрмæстдæр уæлæнгай. Бæстыхай сцалцæг кæныны курдиат скъолайы директор республикæйы Сæргълæууæгмæ бахаста комкоммæ линийы фæрцы. Афтæмæй, скъола хаст æрцыди бындурон цалцæджы программæмæ. Баивтой дзы рудзгуытæ, хæринаггæнæн блок, сног кодтой зæронд кълæстæ æмæ ма сарæзтой ногтæ дæр. Кабинæттæ иууылдæр ифтонггонд сты нырыккон кусæнгæрзтæй. Скъолайы æдæппæтæй ахуыр кæны 7 сæдæ адæймаджы. Знонæй фæстæмæ дзы ахуыртæ райдыдтой раздæры фæткмæ гæсгæ.
Бындурон цалцæггæнæн куыстытæ фесты Ольгинскæйы Мамсыраты Хаджумары номыл скъолайы дæр. Бæстыхай сног кодтой æххæстæй. Аивтой йын йæ сæр, дондзæуæн æмæ хъармгæнæн системæтæ, стæй электрон хызтæ. Сæвæрдтой дзы ног кусæнгæрзтæ. Куыстытæ дзы цыдысты афæдзы рдæг. Скъолайы уыцы рæстæг ахуыртæ нæ баурæдтой.