Йæ нысан – фæндаггон-транспортон фыдбылызтæ фæкъаддæр кæнын
Фæстаг бонты уæлдæфы температурæ бæрзонд кæй схизы, уый тыххæй республикæйы паддзахадон автоинспекцийы кусджытæ фæндаггон патрулон службæйы инспектортимæ федералон фæндаг «Кавказ»-ы сарæзтой профилактикон мадзал. Йæ нысан – фæндаггон-транспортон фыдбылызтæ фæкъаддæр кæнын. Бæрæг куыд у, афтæмæй тынг хур бонты шофыртæ тагъддæр бафæллайынц фæндагыл. Уый та расайы уымæ, æмæ сын къæрцъхъус уæвын зындæр вæййы. Профилактикон мадзалы рæстæг инспектортæ шофырты фарстой, сæхи куыд æнкъарынц, уымæй. Скодтой сын амындтытæ, æнтæф бонты растдæр хи куыд дарын хъæуы машинæ тæргæйæ, уый фæдыл. Уымæй дарддæр сын сæ зæрдыл лæууын кодтой фæндаггон фæтк æмæ нысанты тыххæй. Пъæлицæйгтæ шофыртæн уæрстой зæрдылдарæн буклеттæ æмæ уазал доны æвгтæ, акцийы символикæимæ. Машинæты хицæуттæ та инспектортæн дзырдтой бузныджы ныхæстæ, ахæм аудындзинады тыххæй.
