Конкурсы архайджытæ уыдысты Уæрæсейы æппæт регионтæй
Базарадон-экономикон техникумы 3-æм курсы студент Калоты Ацæмæз сси национ чемпионат «Абилимпикс»-ы уæлахиздзау. Конкурсы архайджытæ уыдысты Уæрæсейы æппæт регионтæй. Ныр Ацæмæзæн фадат ис, президентон платформæ «Россия – страна возможностей»-ы проект «Больше, чем путешествие»-йы бацархайынæн. Дæсны хæринаггæнæджы æнтыстдзинæдты тыххæй Тъехты Элинæйы сюжет.
Калоты Ацæмæзы къухты руаджы хыссæйæ рауайы дзадджын хойраг. Ирон чъиритæ кæнын райдыдта, 13 азы йыл куы цыд, уæд. Ахуыр æй кодта йæ мад. Куыд зæгъы, афтæмæй йын кæд фыццаг рæстæг зын уыд, уæддæр йæ ныфс нæ асаст. Куыстуарзаг кæй у, уый тыххæй йæ ахуыргæнджытæ дæр бирæ уарзынц.
Санаты Фатимæ, Ахуырады мастер: «Куы райдыдтам цæттæ кæнын ацы ерыстæм, уæд нын уыд тынг зын. Тыхстыстæм, фæлæ лæппуйæн зæрдæ куы бавæрдтам, уæд æм фæзынд ныфс. Алы бон кодтам алы хуызон кæрдзынтæ. Махæн худинаг уыдаид, фыццаг бынат куы нæ бацахстаиккам, уæд. Чъиритæ аразынц алы бæстæты, фæлæ махæн та у нæ национ хæринаг».
Ацæмæз йæ сабибонтæй фæстæмæ зыдта, хæринаггæнæг кæй уыдзæн, уый. Дæнцæг ын уыдысты йæ бинонтæ. Алчидæр сæ у арæхстджын хæринаггæнæг. Лæппу къæбæр кæнын равзæрста, уымæн æмæ уарзы хыссæимæ архайын. Ирон чъиритæ кæнын та уæлдай цымыдисаг у. Алкæмæн дæр ис йæхи сусæгдзинæдтæ. Фæлæ дзы сæйраг бæрцытæ нæ, фæлæ хæринаггæнæджы æнкъарæнтæ сты. Куысты бынаты сыгъдæгдзинад, хойраджы ад æмæ рæстæг. Конкурс «Абилимпикс»-ы уыцы домæнтæ хъæуы æххæст кæнын. Национ чемпионатмæ цæттæгæнгæйæ Ацæмæз скодта бирæ чъиритæ. Куыста йæхиуыл, цæмæй иу хаттæй иннæ хатмæ пецæй иса рæсугъддæр чъиритæ.
Ацæмæз ныридæгæн у бирæ конкурсты уæлахиздзау. Фæлæ ууыл æрлæууынмæ нæ хъавы. Фидæны йæ фæнды нутрициолог суæвын, фæлæ ирон чъиритæ кæндзæн кæддæриддæр.
