Ныртæккæ дзы æмбырд кæнынц уникалон экспозици
Беслæны байгом кæнынмæ цæттæ кæны терроризмы профилактикæйы æппæтадæмон культурон патриотон центр «Беслан. Школа № 1″. Ныртæккæ дзы æмбырд кæнынц уникалон экспозици. Ацы хъуыддагмæ йе *вæрæн бахаста нæ телекомпани дæр. Бæлвырддæр радзурдзæн Хъайтмазты Дзерассæ.
Зæрдæйæн ахæм зынаргъ дзаумæттæ ныр ам сты, терроризмы профилактикæйы æппæтадæмон культурон-патриотон центры Беслæны. Гуыриаты Надеждæ уыцы 3 уæззау сентяброн боны арвыста спортзалы йæ сывæллæттимæ. Уыдонæй дыууæ Барис æмæ Верæ фæмардысты. Не *хсæн чи нал ис, уыдоны намыс бахъахъхъæнын Надеждæйæн сси сæйраг нысан. 20 азы æмбырд кодта, терактимæ цыддæриддæр баст у, уыцы æрмæджытæ. Абон систы, намысы стыр музейы экспонаттæ.
2017-æм азы рацыд Хъуысаты Тимуры документалон киноныв «Беслан. Бесконечность». Куыст райста æппæтуæрæсеон фестиваль «Человек и вера»-йы хæрзиуæг Псковы. Зæды статуэткæ ныр суыдзæн музейы хай. Паддзахадон телерадиокомпани «Алани»-йы директор æй ценртæн радта кинонывимæ æмæ телекомпанийы видеоархивтимæ æдзух пайда кæнынмæ.
Терроризмы профилактикæйы центр «Беслан. Школа № 1»-ы арæзтад хаст у, Цæгат Кавказы федералон зылды райрæзты паддзахадон программæмæ. Мемориал æххæст уыдзæн нырыккон технологитæй æмæ мультимедийæ.
Рæстæгимæ рыст нæ къаддæр кæны. Рæстæг ахуыр кæны уыцы рыстимæ цæрын æмæ ивгъуыды рæдыдтытæ мауал бауадзын. Беслæны трагеди у иумæйаг хъæдгом. Æмæ йæ кæддæриддæр хъæуы зæрдыл дарын.
