Уыдзæн дзы 230 бынаты
Беслæны байгом кодтой ног рæвдауæндон. Уыдзæн дзы 230 бынаты. Ацы цаумæ бынæттон цæрджытæ рагæй æнхъæлмæ кастысты. Уымæн æмæ нырæй фæстæмæ иннæ рæвдауæндæттыл уыйбæрц уаргъ нал уыдзæн. Ног объект саразын бантыст, национ проект «Демографи»-йы фæрцы. Беслæны цæрджыты цины æнкъарæнтæн æвдисæн уыд не сфæлдыстадон къорд, æмæ бæлвырддæр хабæрттæ радзурдзæн Гуытъиаты Алинæ.
Ног сывæллæтты рæвдауæндоны арæзтадæн бахъуыдис афæдзæй фылдæр. Фæлæ куыд фæзæгъынц, хаттæн ахæрынæй анхъæлмæ кæсын хуыздæр вæййы. Цалынмæ бæрæгбоны программæ цыдис, уæдмæ сывæллæттæ сæ мидбынаты катай кодтой — фæндыдис сæ рæвдауæндоныл æрзилын. Сырх лент куы алыг кодтой, уæд райдыдта экскурси. Уазджытæ федтой егъау тыргътæ, аив агъуыстытæ æмæ къордтæ. Рæвдауæндоны ифтонгдзинад адæймаджы дисы æфтауы.
Ирд, рæсугъд æмæ хъæлдзæг бынæттæ, цæмæй сывæллæттæ сæхи ирхæфсгæйæ ахуыр кæной, уымæн. Музыкалон æмæ спортивон зал, медицинон кабинет, хи гæрзтæхсæн æмæ хæрæндон. Сывæллæтты рæвдауæндоны ис 230 бынаты. Абон уый нымад у Рахизфарсы районы æппæты егъаудæр рæвдауæндоныл.
Зæронд рæвдауæндоны уыдис æрмæстдæр нæуæдз бынаты, фæлæ кусджыты фиппаинагмæ гæсгæ, алы азты ацы ранмæ уыцы иу рæстæг цыдысты сæдæ фæндзай сабийы дæр. Зæронд бæстыхай сарæзтой ивгъуыд æнусты æртынæм азты. Йæ бынаты йын сарæзтой скъола, сывæллæтты та адих кодтой алы рæвдауæндæттыл.
Ног дыууæуæладзыгон рæвдауæндон æрбынат кодта зæронд бæстыхаймæ æввахс. Сарæзтой йæ национ проект Демографийы фæрцы. Кæд арæзтады рæстæг бирæ къуылымпыдзинæдтæ уыд, уæддæр подрядчик объект радта афойнадыл.
Ног рæвдауæндоны кусдзысты 12 къорды, уыдонæй дыууæ — хæрзчысыл сабитæн. Педагогтæ æмæ хъомылгæнæгтæ зонгæ кæнынц сæ ног куысты бынатимæ. Фæллойгæнджыты къорд æвзæрстой бæлвырд, ис дзы куыд фæлтæрдджын кусджытæ, афтæ æрыгон специалисттæ дæр.
Сывæллæтты рæвдауæндоны алыварс территори у егъау. Ис дзы автономон хъармгæнæн æмæ хицæн трансформатор. Алыварс территори аив кодта æндæр подрядон куыстуат, фæлæ йæ ног фæлыст хорз сфидыдта бæстыхайы æддаг бакастимæ. Ам алы къордæн дæр уыдзæнис йæхи фæлладуадзæн бынат. Ис дзы хъазæн змис, бадæн бынæттæ æмæ æндæрхуызон ирхæфсæнтæ. А дыууæ боны ацы бынаты айзæлдзысты сывæллæтты хъæлæстæ. Сабитæ зæрдæрайгæйæ згъордзысты сæ ног бынатмæ.
