Фæлæ йын рохгæнæн нæй
19 азы 19 боны не сты. Рыст нæ мынæг кæны. Беслæны теракт не ппæты цард дæр адих кодта дыууæ хайыл. Фæлæ йын рохгæнæн нæй. Трагедийы бынаты аразын райдыдтой культурон–патриотон центр. Йæ саразыны хъæппæрис разынд Беслæны мадæлты комитетмæ. Центр саразыны куыстытæ райдыдтой 2021-æм азы, августы кæрон. Бæстыхай уыдзæн равдыстыты сæйраг бынат. Ныридæгæн кусынц экспозицийы концепцийыл.
19 азы. Уыцы рæстæгыл куы ахъуыды кæнай, уæд, æвæццæгæн, фаг у, цæмæй уæззау цау ферох кæнай, уый тыххæй. Фæлæ Беслæны цы æвирхъау цау æрцыд, уый канд Ирыстоны нæ, фæлæ Бæстæйы алы цæрæджы зæрдæйы дæр баззайдзæн. Цасфæнды рæстæг куы рацæуа, уæддæр скъоламæ æрбахизгæйæ уæнгты ахъары адæмы рис. Ис дзы къамтæ. Вдисынц хъарм, æнæхин, æмæ зындзинад чи нæма федта, ахæм цæстытæ.
Адæмы зæрдæты рыст банкъарынмæ ардæм æрбацæуынц бирæтæ. Кæд рæстæг рацыд, уæддæр ницы аивта. Æрмæстдæр скъолайы хуыз. Сабыргай хæлы, фæлæ уымæн бауадзæн нæй, уымæн æмæ уæд нысан кæндзæн, уыцы цау кæй ферох кодтам, уый. Æгъатыр террористтæ цы 334 уды ахастой, уыдоны. Трагедийы бынаты культурон – патриотон центр саразыны хъæппæрис разынд Беслæны мадæлтæм. Уымæн æмæ уыдон уæлдай тынг æнкъарынц, йæ бахъахъхъæнын куыд ахсджиаг у, уый.
Æмæ йын ис æрмæстдæр иу функци. Зæрдылдарын, адæм цы æгъатыр вæййынц, æмæ сæ ныхмæ слæууын куыд ахсджиаг у, уый. Цалынмæ скъола хъахъхъæны истори, уæдмæ адæм та хъахъхæнынц скъолайæн йæхи. Йæ алы къуымы дæр ахъардта цæссыг. Спортивон зал реставрацигæнгæйæ, мастертæ куыстой лыстæг кусæнгæрзтæй. Цæмæй фæхъæддыхдæр кæной къултæ, фæлæ дзы ныууадзой, террористтæ дзы цы ностæ ныууагътой, уыдон. Спортивон фæзæй уæлдай бакуыстой кабинеттыл, цæлгæнæныл æмæ коридорыл. Уæдæ специалисттæ сног кодтой зæронд корпус дæр. Æддаг бакастæй у, 2004-æм азы куыд уыд, ахæм. Мидæгæй йæ скодтой нырыккон цалцæг, цыма ног царды символ у, уыйау. Бæстыхай уыдзæн равдыстыты сæйраг бынат. Ныридæгæн кусынц экспозицийы концепцийыл.
Центр саразыны куыстытæ райдыдтой 2021-æм азы, августы кæрон. Бæлвырд домæнтæ, фæллой æмæ бæрнон адæм. Проектмæ бахæссын цытæ хъуыд, уыдоныл специалисттæ нæ хъуыды кодтой. Æрмæстдæр куыстой, цæмæй фидæны рауайа иугонд комплекс.
Фыццаг дзæнгæрæг бирæтæн сси фæстаг. Хъæлдзæг æмæ æнæсагъæс сабитæ. Сæ хъуыдыйы дæр нæ уыд, уыцы бæрæгбон æрхæндæгыл кæй раивдзæн, уый. Æмæ центр аразгæйæ алчидæр хъуыды кодта уыцы сывæллæттыл. Сæ хъысмæт террористты къухты кæмæн уыд, уыдоныл.
2004-æм азы 1-æм сентябрь. Уыцы бон аивта Беслæны æмæ æнæхъæн Ирыстоны цæрджыты хъысмæт. Æмæ æнусмæ баззайдзæн алы адæймаджы зæрдæйы дæр.
