Уыцы-иу рæстæг бындурон цалцæг цæуы 3 корпусы
Бирæ ногдзинæдтæм æнхъæлмæ кæсы Цæгат Ирыстоны педагогон колледж. Уыцы-иу рæстæг бындурон цалцæг цæуы 3 корпусы: дыууæ сты Кутузовы уынджы, Карл Марксы уынджы историон бæстыхайы та ныр цæуы куыстыты дыккаг къæпхæн. Цалцæг цæуы национ проект «Фæсивæд æмæ сывæллæттæм» гæсгæ. Педагогон колледжы студентты нымæц у 1 минæй фылдæр. Ахуырадон процесс къуылымпыгонд не *рцыд. Ныридæгæн цы куыстытæ æххæстгонд æрцыдысты, уый тыххæй радзурдзæн Чехойты Фатимæ.
Бæстон архайд æнусон истори хъуыдыгæнгæйæ. Хъæдæрмæджы куыстгæнæг Кокайты Сослан арæхстгай исы зæронд ахорæны цъар, цыма 20-æм æнусы райдиан 3-метры бæрзæнд дуæртты *хсæн Сылгоймæгты дыккаг гимназы хъомылгæнинæгтæ куыд цыдысты, уыцы историон цау гом кæны, афтæ. Уыцы хъæдæй конд рагон дуæрттæн раздахдзысты сæ раздæры хуыз, фæлæ ныр Цæгат Ирыстоны педагогон колледжы ныртæккæйы студенттæн.
Сæдæ азы размæйы уынд ис сыхаг агъуыстыты дуæрттæн, реставраци сæ скодтой фарон бæстыхайы галиу фарсы бындурон цалцæджы рæстæг. Уæвгæ, колледжы агъуыстыты историон элементтæ чысыл нæй, уымæн æмæ объект нымад у культурон цыртдзæвæныл. Зæгъæм, специалисттæ сног кæндзысты пъолты рагон плиткæйы хуыз. Ныры рæстæг ахæм ссарæн нæй, йæ саст хæйттæ йын саразын хуымæтæг хæс нæу. Хъахъхъæд æрцæудзысты уникалон карнизтæ, паркетæй конд пъол æмæ хъæдын къултæ. Бæстыхай историон кæй у, ууыл дзуры алы агуыри дур дæр. Специалисттæ реставраци скæндзысты асинтæ дæр. Уыцы куыстытæй уæлдай, колледжы бæстыхайы рахиз фарсы цæуы егъау бындурон цалцæг. Архайынц дзы 18 аразæджы. Ныридæгæн фесты хæрæндоны æмæ фойейы къулты демонтаж. Объекты ацы хай хъуамæ фæуой æппæтæй раздæр. Бахизæн агъуыст цæттæ уыдзæн сентябры. Уымæй уæлдай ивд æрцыдысты инженерон коммуникацитæ.
Ацы корпус дæр хауы педагогон колледжмæ, ам дæр цæуы бындурон цалцæг. Æххæст æй кæны æндæр подрядон куыстуат. Баивтой коммуникацитæ: хъармгæнæн æмæ доны системæтæ, стæй электрон тыхы хыз. Объект цæттæ у 85 процентæн. Агъуыстыты фесты мидæггаг куыстытæ. Специалисттæ сцалцæг кодтой хæринаггæнæн, актон зал æмæ кълæстæ. Сног кодтой бæстыхайы сæр, ныртæккæ архайынц æддаг къул саив кæныныл, сцалцæг кæндзысты асинтæ дæр.
Подрядон куыстуатæн объект зын нæу, специалисттæм ис егъау фæлтæрддзинад. Цы къуылымпы кодта, уый æрмæст — боныхъæд. Куыстытæ бавнæлдтой мартьийы, проектмæ гæсгæ йæ хъуамæ радтой ноябры, фæлæ аразджытæ фæуыдзысты фæткæй раздæр, студенттæ партæты раз сбаддзысты ног ахуыры аз.
Колледжы кусджытæ æмзонд сты подрядон куыстуаты минæвæрттимæ. Цæст дарынц цалцæджы цыдмæ, фадат сын ис ахорæнты хуызтæ æвзарын. Ацы корпус арæзт æрцыд 55 азы размæ. Уæдæй нырмæ дзы бындурон цалцæг иу хатт дæр нæ уыд, уыцы рæстæгмæ дзы сæмбырд бирæ лыггæнинаг фарстытæ.
Цæгат Ирыстоны педагогон колледжы 4 корпусæй бындурон цалцæг цæуы 3-йы. Æппæт куыстытæ æххæстгонд сты национ проект «Фæсивæд æмæ сывæллæттæм» гæсгæ.
