Ам ныгæд сты, 1942-æм азы Джызæл суæгъд кæныныл чи тох кодта, уыцы дыууæ мин советон салдатæй æмæ офицерæй фылдæр
Сæ фæстаг улæфтмæ хъахъхъæдтой Фыдыбæстæ. Дæллаг Санибайы цалцæг кæнынц æфсымæрон ингæн. Ам ныгæд сты, 1942-æм азы Джызæл суæгъд кæныныл чи тох кодта, уыцы дыууæ мин советон салдатæй æмæ офицерæй фылдæр. Хæсты фæстæ бынæттон цæрджытæ сæхи хъарутæй зылдысты мемориалмæ, фæлæ уый фаг нæ уыд. Ныртæккæ цалцæгæн фæрæзтæ радих кодта Цæгат Ирыстоны культурæйы министрад. Йе вæрæн бахаста районы администраци дæр. Кусинæгтæ бирæ, уымæ гæсгæ æххуыс кæнынц зæрдæхæлар адæм æмæ æвзонг активисттæ. Бæстондæр радзурдзæн Касаты Наирæ.
Фашизмы ныхмæ æхсаргард чи систа, уыцы хæстоны фæлгонц æнустæм дурыл. Дæллаг Санибайы æфсымæрон ингæны мемориалæн бындур æвæрд æрцыди 1965-æм азы. Уæлахизы 79-æм азы агъоммæ Цæгат Ирыстоны культурæйы министрады æмæ Горæтгæрон районы администрацийы хъарутæй цыртдзæвæн сцалцæг кодтой æмæ йын йæ иу хай сног кодтой.
Знаджы ныхмæ тохгæнгæйæ йæ цард кæмæн аскъуыди, уыцы хæстонты номхыгъд мемориалыл… Мыггæгтæн цымæ кæрон дæр нæй, афтæ кæсы адæймагмæ. Фæлæ уый у, Дæллаг Санибайы æфсымæрон ингæны ныгæд чи ис, уыдоны гыццыл хай. Ам ис 2 мин Советон салдатæй фылдæр, фæмард сты Джызæлмæ бацæуæны, 1942-æм азы, ноябры. Ныртæккæ дзы бæрæг сты æрмæстдæр 257 æфсæддоны номы, сты алы адæмыхæттыты минæвæрттæ. Иннæ æбæрæг хæстонты сбæрæг кæныны хæс йæхимæ чи райста, уыдонмæ разæй æнхъæлмæ кæсы стыр куыст.
Газонтæм базилын, къæйдур ныссыгъдæг кæнын, быру æмæ бордюртæ сахорын, стæй алыварс бафснайын. Дæллаг Санибайы цæрджытæн традици у мемориалтæм æрмæст бæрæгбоны размæ нæ, фæлæ афæдзы дæргъы зилын. Кæд боны ахаст æнтæф у, уæддæр фæсивæд фæллад нæ зонгæйæ фæллой кæнынц æвæллайгæйæ. Ацы хистæркъласон фæсивæд сты ахуырадон бригадты хыгъды, зилынц цыртдзæвæнтæм æмæ аив кæнынц территоритæ. Сæ фарсмæ сты хистæртæ дæр. Хъæуы цæрджытæй иу Джыккайты Малхаз йæхимæ райста хæстонты мыггæгтимæ къæйдур сног кæнын, уыцы куыст хъуамæ сæххæст кæна 9-æм майы онг.
Дæллаг Санибайы центры ма ис ноджыдæр иу мемориал – хъæуы цæрджытæй хæсты быдырæй чи нал сыздæхт, уыдонæн. Ацы салдат раздæрау лæууы райгуырæн бæстæйы сæраппонд. Æмæ йæ æнæмæнгæй бахъахъхъæндзæн, цалынмæ йын йæ хъæбатырдзинад хъуыды кæнæм, уæдмæ.
