Проектмæ гæсгæ ныр ног хæтæлтæ сæвæрдзысты 100 километрæй фылдæр
Дигорайы ивынц доны хæтæлтæ. Зæронд коммуникацитæ сæвæрдтой ивгъуыд æнусы 60-йæм азты. Донæй пайда кæныны хъуыддаг кæй сырæзт, уымæ гæсгæ сæ куыст æдзух къуылымпы кодта. Проектмæ гæсгæ ныр ног хæтæлтæ сæвæрдзысты 100 километрæй фылдæр. Бæлвырддæр радзурдзæн Хъайтмазты Дзерассæ.
Къахт зæхх, кусгæ техникæ æмæ æвæрынмæ цæттæ ног хæтæлтæ. Ахæм уавæр ныртæккæ ис Дигорайы алы къуымы дæр. Цæрджыты уый нæ хъыгдары. Адæм цин кæнынц, уымæн æмæ ацы хъуыддагмæ рагæй æнхъæлмæ кастысты. Доны системæйы куыст арæх къуылымпы кодта æмæ цæрджыты тасы æфтыдта.
Ныр уыцы зындзинæдты тыххæй ферох кæнын ис. Доны системæйы стыр рацарæзт Дигорайы йæ тæмæны ис. Кусджытæ баивдзысты доны хæтæлтæ 100 километры дæргъы.
Ныртæккæ объектыл архайы 24 бригады. Техникæйы 100 иуæгæй фылдæр æмæ 170 адæймаджы кусынц æрвылбон. Алцыдæр, цæмæй куыстытæ афоныл æххæстгонд æрцæуой. Ног хæтæлтæ æвæрынц сæрмагонд техникæмæ гæсгæ, цæмæй зæрæдтæ ма бахъыгдарой, афтæ.
Зæронд хæтæлтæ сæвæрдтой суанг ивгъуыд æнусы 60-йæм азты. Абон сыл цы уаргъ æвæрд ис, уымæн нал фæразынц. Рацаразæн куыстытæ райдыдтой мартъийы астæу.
Доны системæйы рацарæзт æххæстгонд цæуы паддзахадон программæмæ гæсгæ. Куыстытæ фæнд кæнынц ацы азы кæронмæ фæуын.
