Бæстыхай арæзт æрцыд 1953-æм азы, æмæ йæм ныры онг бындуронæй зылд никуыма уыд
Дзæуджыхъæуы 24-æм скъола йæ дуæрттæ байгом кодта бындурон цалцæджы фæстæ. Бæстыхай арæзт æрцыд 1953-æм азы, æмæ йæм ныры онг бындуронæй зылд никуыма уыд. Цалцæггæнæн куыстытæ æххæстгонд цыдысты, скъолайы кусджыты, ахуырдзауты æмæ сæ ныййарджыты фæндтæ хынцгæйæ. Ног уавæрты тыххæй бæлвырддæр радзурдзæн Хъайтмазты Дзерассæ.
6 мæйы фæстæ та 24-æм скъолайы ахуырдзаутæ æрбаздæхтысты сæ уарзон ахуыргæнæндонмæ. 1953-æм азы цы бæстыхай сарæзтой, уый ныры онг бындуронæй цалцæггонд никуы уыд. Уыимæ йе 70 процентæй фылдæр уыд кæлæддзаг. Ахæм хуыз скъолайæн уыд фарон – фаз штукатуркæ, пъолты зыхъхъыртæ, æнæзæрдæмæдзæугæ æддаг бакаст. 2022-æм азы майы федералон программæ «Ахуырады райрæзт»-мæ гæсгæ райдыдта цалцæг.
Зымæджы æппæтæй уазалдæр бонты дæр ныр скъолайы хъарм у – ног хъармгæнæн системæ æххæст тыхæй кусы. Цалцæджы рæстæг баивтой æппæт коммуникацитæ. Бæстыхайы сæвæрдтой зынгсирвæзæн автоматикон æмæ видеоцæстдарды системæтæ, фæзынд ног компьютерон кълæстæ.
Агъуыстытæ куыд саив кæной, уый равзарыны хъуыддаджы скъолайы кусджытæн æххуыс кодтой ахуырдзаутæ æмæ сæ ныййарджытæ. Хæрæндон скодтой хай-тек стилы, фæуæрæхдæр æй кодтой æмæ сифтонг кодтой нырыккон кусæнгæрзтæй. Кабинетты фæзынд ног хъæддзаума, ахуыры интерактивон фæрæзтæ.
Спортивон залæн равзæрстой стиль «лофт» – сæвæрдтой дзы ног уæлцъар, йæ фарсмæ дзаумæттæивæн æмæ хинайæн агъуыстытæ. Актон залы ма чысыл куыстытæ æххæст кæнынц. Сфæнд кодтой, Нары пейзажимæ ныв сног кæнын. Уыцы куыст кæнынц аивадон училищæйы студенттæ. Фæаивдæр бæстыхайы æддаг бакаст дæр. Сталины заманты конд архитектурон хуызы декоративон элементтæн, рацарæзты фæрцы, фæзынд ног цард. Сæйрагдæр та у, скъолайы ахуырадон процессы хъæрзхъæддзинад кæй фæхуыздæр, уый.
