Цыбыр рæстæгмæ арæзтадон бригадтæ среставраци кодтой бæстыхай, сног кодтой коммуникацитæ
Дзæуджыхъæуы бындурон цалцæджы фæстæ йæ дуæрттæ байгом кодта фæсивæды республикон галуан. Цыбыр рæстæгмæ арæзтадон бригадтæ среставраци кодтой бæстыхай, сног кодтой коммуникацитæ. Кусæнуатмæ балхæдтой ног хъæддзаума. Бæлвырддæр хабæрттæ радзурдзæн Хъайтмазты Дзерассæ.
Фæсивæды ног цалцæггонд галуаны музыкæ зæлы. Йæ дуæрттæ байгом кодта йæ рагон хæлæрттæн æмæ ног уазджытæн. Бындурон цалцæг ам нæ уыд 50 азы. Баивтой хъармгæнæн системæ, сæххæст кодтой аивгæнæн куыстытæ, балхæдтой ног хъæддзаума. Куыстытæ конд æрцыдысты 2 мæйы æмæ *рдæгмæ.
Бындурон цалцæг скодтой, Уæрæсейы Федерацийы субъектты фæсивæдон политикæйы комплексон райрæзты æппæтуæрæсеон программæ «Регион æрыгæттæн» æххæстгæнгæйæ. Уымæ гæсгæ радих кодтой 105 милуан сомы. Стыр куыст бакодтой. Ныр галуаны ис ифтонггонд тренажерты зал, музыкæ фыссæн студи, концерттæ аразынæн ног кусæнгæрзтæ. Цалцæджы фæстæ бæстыхайы фæзынд буфет æмæ чысыл фæлладуадзæн зонæ.
Галуан гом кæныны кадджын мадзал бабæрæг кодтой фæсарæйнаг уазджытæ – фæсивæды Æппæтдунеон фестивалы архайджытæ. Се ппæтæн дæр раарфæ кодта Хицауады сæрдары хæдивæг Платы Альбинæ.
Делегацитæн уый республикæйы уыд фыццаг бон. Базонгæ сæ кодтой Цæгат Ирыстоны национ культурæимæ æмæ хæринæгтимæ.
Фæсивæды республикон галуаны ныртæккæ сног кодтой сæ куыст 19 къорды. Сфæлдыстадон æмæ спортивон коллективтæ дарддæр ахадгæйæ архайынц горæты æмæ республикæйы мадзæлтты.
