Ацы аз базилдзысты сывæллæтты 16 рæвдауæндонмæ
Дзæуджыхъæуы дарддæр цæуы скъолайы агъоммæйы куыстуæтты бæстон цалцæг. Ацы аз базилдзысты сывæллæтты 16 рæвдауæндонмæ. Бирæты дзы дæсгай азты нæ уыд бæлвырд модернизаци. Проекттæ æххæстгонд цæуынц горæты минæвæртты æмбырды депутатты хъæппæрисы æххуысæй. Уыдон аргъ скодтой рæвдауæндæтты уавæрæн æмæ сæ къухы бафтыд, цæмæй фæрæзтæ радих кæной. Бæлвырддæр радзурдзæн Хъайтмазты Дзерассæ.
Дзæуджыхъæуы сывæллæтты 173-æм рæвдауæндон сарæзтой 60 азы размæ. Уыцы рæстæгмæ ам бындурон цалцæг нæ уыд. Горæты минæвæртты æмбырды депутатты хъæппæрисы фæрцы риссаг фарстаты фылдæр хай бантысдзæн алыг кæнын муниципалон бюджеты фæрæзтæй. Цалцæггæнæн куыстытæ райдыдтой 6 мæйы размæ. Специалисттæ баивтой инженерон хызтæ, къордты сног кодтой сантехникæ, сæвæрдтой вентиляци дæр.
Цалынмæ сывæллæтты 173-æм рæвдауæндоны цалцæг цæуы, уæдмæ уал 130 хъомылгæнинаджы раивтой сыхаг кусæнуаттæм. 10-æм рæвдауæндон дæр æнхъæлмæ кæсы цалцæггæнæн куыстытæм. 1962-æм азы арæзт бæстыхай æнæмæнг базилинаг у. Горæты минæвæртты æмбырды депутаттæ бабæрæг кодтой ацы объект дæр. Пъланмæ гæсгæ цалцæг ам райдайдзæн афæдзы дыккаг æмбисы.
Æдæппæтæй цалцæггæнæн куыстытæ ацы аз æххæстгонд уыдзысты Дзæуджыхъæуы 16 рæвдауæндоны. Ацы хъуыддаг къухы бафтыд, фарон горæты минæвæртты æмбырды депутатты хыгъдæй цы кусæн къорд арæзт æрцыд, уый фæрцы. Уыдон скодтой базилинагдæр кусæнуатты номхыгъд. Бацыд æм 75-æм рæвдауæндон дæр. Хъармгæнæн æмæ электрон тыхдæттæг системæтæ, инженерон хызтæ – лыггæнинаг фарстатæ бирæ. Ам куыстытæм нырма ныр бавнæлдтой, фæлæ зæрдæ бавæрдтой, ног ахуыры азы райдианмæ сæ фæуын.
Рæвдауæндæттæ бындуронæй цалцæг кæнынц федералон программæмæ гæсгæ, хуымæтæг куыстытæ та – муниципалон фæрæзты хыгъдæй. Депутатты ныхæстæм гæсгæ, рæвдауæндæтты бындурон цалцæг у сæ архайды сæйрагдæр къабæзтæй иу. Ацы куыст æрмæст дарддæр нæ хæццæ кæндзысты, фæлæ ма йæ ракæндзысты ног æмвæзадмæ.
