Архайдтой дзы 44 командæйы республикæйы æппæт районтæй æмæ ма дыууæ командæйы Хуссар Ирыстонæй
Роботты фæрцы хъыгдардбаййафджытæн куыд баххуыс кæнæн ис? Дзæуджыхъæуы кæронмæ æрхæццæ сты робототехникæйæ ерыстæ «Робоэкстрим». Архайдтой дзы 44 командæйы республикæйы æппæт районтæй æмæ ма дыууæ командæйы Хуссар Ирыстонæй. Зæгъын хъæуы уый, æмæ робототехникæ тынг ахъаз у инженерон æмæ стратегион хъуыдыкæнынадæн. Ерысты архайджыты тыххæй бæстондæр радзурдзæн Фидараты Маринæ.
Командæ фехъусгæйæ робот йæ бынатæй базмæлы. Йæ нысан у – цæлхдурты сæрты ахизын, бынатмæ бахæццæ уæвын æмæ хъыгдардбаййафæгæн баххуыс кæнын. Афтæ ацыдысты робототехникæйæ республикон ерыстæ «Робоэкстрим». Арæзт æрцыдысты сывæллæтты нымæцон ахуырады центр «IT-куб»-ы. Нæ республикæйы йæ байгом кодтой, национ проект «Ахуырад»-мæ гæсгæ.
44 командæйы республикæйы æппæт районтæй, æмæ ма дыууæ командæйы та Хуссар Ирыстонæй. Дыууæ кары къорды – 7 азæй – 12 азы онг, стæй 13 азæй – 17 азы онг. «Робоэкстрим»-ы ерыстæ иннæтæй хицæн кæнынц уымæй, æмæ йæ архайджыты раз лæууы бæлвырд хæс – ирвæзын кæныны хæс. Æмраст ацæуын, иу бæлвырд ранæй иннæ бæлвырд ранмæ – уый у, ацы къабазы фыццаг къахдзæфтæ чи кæны, уыдоны хæс, зæгъынц фæсивæд. Фæлæ хæххон уавæрты, фæхстыл ссæуын, æмæ хъыгдардбаййафджыты æдас ранмæ ракæнын – уый та у зынддæр хъуыддаг. Ерысты архайджыты бахъуыд сæ роботты рацаразын, цæмæй сæ размæ æвæрд хæстæ сæххæст кæной, уый тыххæй.
Роботтæ сæ хъомыс хъуамæ кæм равдыстаиккой, уыцы полигон у, абарæн кæмæн нæй, ахæм. Бацæттæ йæ кодтой сæрмагондæй ацы ерыстæн. Бакуыстой йыл математикон ахуырады дзæуджыхъæуккаг центры. Уавæртæ уыдысты æцæг цардмæ хæстæг. Жюрийы та IT-кубы кусджытæ æмæ Цæгат Кавказы хæххон металлургон институты студенттæ.
Робототехникæйæ республикон ерысты нысан у – фæсивæды сфæлдыстадон æмæ интеллектуалон рæзтыл кусын, техникæмæ сын се ргом здахын æмæ инженерон практикон хæслæвæрдтæ лыг кæнын. Цымыдисдзинад чи вдисы, уыцы сывæллæтты цæсгæмттæм кæсгæйæ та бæлвырд у – хæс æххæстгонд æрцыд.
