Йæ уавæр ын сбæлвырд кодта горæты администрацийы сæргълæууæг специалисттимæ
Дзæуджыхъæуы Ленины уынг бырдурон цалцæджы фæстæ фæлварæн нæ радта. Йæ уавæр ын сбæлвырд кодта горæты администрацийы сæргълæууæг специалисттимæ. Инспекцийы хатдзæгмæ гæсгæ, Дзæуджыхъæуы центры йе нæниздзинад хъыгдард кæмæн у, уыцы адæмæн фаг фадæттæ нæй. Бæлвырддæр хабæрттæ радзурдзæн Хъайтмазты Дзерассæ.
Ленины уынджы фæндаг сцалцæг кодтой мæйы размæ. Скодтой дзы пандустæ дæр. Партийон проект «Единая страна – доступная среда»-йы координатор Цæлагкаты Жаннæ сфæнд кодта сæ спайда кæнын.Фæлæ сæрмагонд æрхизæнтæ фæлварæн нæ радтой.
Горæты уынгты пандустæ æвæрыны домæнтæ куыд æххæстгонд цæуынц, уый сбæлвырд кодта Дзæуджыхъæуы администрацийы сæргълæууæг Милдзыхты Вячеслав прокуратурæйы кусджытимæ. Уынгты цы уавæртæ арæзт ис, уымæн аргъ скодтой йе нæниздзинад хъыгдард кæмæн у, уыцы адæм дæр. Цæллагкаты Жаннæйы ныхæстæм гæсгæ пандустæ алы ран дæр ис, фæлæ сæ фылдæры раз ис цæлхдуртæ – бæрзонд бордюртæ.
Йе нæниздзинад хъыгдард кæмæн у, уыцы адæмæн хъуамæ уа æппæт æмбæлгæ уавæртæ, загъта Милдзыхты Вячеслав. Цæмæй алкæмæндæр уынгты йæ бон уа æнæ искæй æххуысæй цæуын. Йæ ныхæстæм гæсгæ, нывылконд пандустæ ма æххуыс уыдзысты сывæллæтты коляскæтыл чи фæласы, уыцы ныййарджытæн дæр.
Сæрмагонд æрхизæнтæ нæй горæты бирæ дуканиты, кафеты æмæ сæрдыгон верандæты. Уыдонмæ хауынц Сабырдзинады проспекты цы объекттæ ис, уыдон дæр. Æдзух мониторингтæ уавæр нæ аивтой.
Инспекцийы хатдзæгтæм гæсгæ, Ленины уынджы фæндаг эксплуатацимæ радтыны æмгъуыд адарддæр кодтой, цалынмæ æппæт къуылымпыдзинæдтæ иуварсгонд не рцæуой, уæдмæ. Уавæрмæ сæ цæст дардзысты прокуратурæйы кусджытæ дæр.
