Уый уыдзæн 3-уæладзыгон бæстыхай
Дзæуджыхъæуы микрорайон «Ног горæты» арæзт цæуы ног скъола 500 бынатæн. Уый уыдзæн 3-уæладзыгон бæстыхай. Конд уыдзæн 4 блокæй. Сæ иумæйаг фæзуат – 8 мины 700 квадратон метры. Ныридæгæн сæвæрдтой бындур, скодтой гидроизоляци. Ныртæккæ аразджытæ рахызтысты фыццаг уæладзыджы монолитон конструкцитæ æвæрынмæ, къултæ æмæ бæстыхайы каркас аразынмæ. Бæлвырддæр радзурдзæн Хъайтмазты Дзерассæ.
æрæджы дæр ма ам уыд æрмæст дзыхъхъ, абон та бындур æвæрд цæуы фидæны скъолайы фыццаг уæладзыгæн. Микрорайон «Ног горæт»-ы дарддæр цæуы ног ахуыргæнæндоны арæзтад. Бындур ныридæгæн цæттæ у, скодтой йын гидроизоляци, ныртæккæ специалисттæ аразынц монолитон конструкцитæ, къултæ æмæ бæстыхайы каркас.
Арæзтад райдыдта ивгъуыд азы кæрон. Объекты æрвылбон кусы 40 специалистæй фылдæр, æппæт сæйраг къæпхæнтæ цæуынц нысангонд фæткмæ гæсгæ. 3-уæладзыгон бæстыхайы уыдзæн 500 бынаты.
Фидæны скъолайы æрмæст кълæстæ æмæ къæлидортæ нæ уыдзæн. Ам фæзындзæн спортивон, актон æмæ хореографион залтæ, робототехникæйы æмæ шахмæтты кабинеттæ, аивæдты студи. Уыдзæн сывæллæттæн фæлладуадзæн зонæтæ, медицинон кабинеттæ, уæрæх хæрæндон æмæ педагогты куыстæн хицæн тыгъдад.
Проектмæ гæсгæ бæстыхай дих уыдзæн 4 блокыл. Алкæцыйæндæр йæхи нысан. Ацы азмæ аразджыты сæйраг хæс у – скæнын фидар каркас. Базилдзысты территоримæ дæр. Арæзтад цæуы национ проект «Фæсивæд æмæ сывæллæтты» федералон проект «Все лучшее детям»-мæ гæсгæ. Скъола сцæттæ кæнын фæнд кæнынц 2028-æм азы.
