Фæцис йæ бындурон цалцæджы фыццаг къæпхæн, ныридæгæн цæттæ сты 2-аг æмæ 3-аг уæладзгуытæ
Дзæуджыхъæуы паддзахадон бирæвæрсыг техникум цæттæ кæны студенттыл ноггондæй сæмбæлынмæ. Фæцис йæ бындурон цалцæджы фыццаг къæпхæн, ныридæгæн цæттæ сты 2-аг æмæ 3-аг уæладзгуытæ. Куыстыты цыды тыххæй бæстондæр радзурдзæн Чехойты Фатимæ.
Ивгъуыдимæ бастдзинад архитектурæйы руаджы равдисын — бæстыхайы æнусты историйыл дзурæг. æфсæддон училищæ амад æрцыдис 1913-æм азы. 113 азы размæ куыд уыдис, афтæ ныр дæр ам æххæстгонд цæуы ахуырадон процесс, æцæг йæ рауагъдонтæ офицертæ не сты, фæлæ специалисттæ. Ахуыргæнæндон куы байгом, уæдæй нырмæ дзы бындурон цалцæг никуы уыдис.
Арæзтадон бригадæйæн куыстытæм бавналын æппæты райдиан æнцон нæ уыдис. Демонтажы рæстæг æмбæрстгонд æрцыд, культурон хæзнаты хыгъдмæ цы бæстыхай хауы, уый бындурон цалцæг реставрацион куыстытимæ æххæст кæнын кæй хъæудзæн, уый. Фыццаг уæладзыджы аудиториты рабæрæг сты, проектмæ хаст чи нæ уыдис, ахæм хъæндзинæдтæ. Уыдонæн бахъуыдысты уæлæмхасæн фæрæзтæ æмæ рæстæг.
Бындурон цалцæг райдыдта 2025-æм азы. Ныридæгæн фæцис 2-æм æмæ 3-æм уæладзгуыты цалцæг, 1-æмы — æххæстæй нæма. Арæзтады нырыккон хуызтæ баиу сты историон дизайнимæ. Зæгъæм, сног кодтой асинты хæцæнтæ, агуыридурæй амад къултæн та хъахъхъæд æрцыдис сæ раздæры конд. Ныртæккæ ахуыргæнджытæ æмæ студенттæ æфснайынц, цалцæг кæм фæцис, уыцы агъуыстытæ. Ифтонг сæ кæнынц нырыккон техникон фæрæзтæй. Уыдон æлхæд æрцыдысты, федералон проект «Профессионалитет»-мæ гæсгæ — ахуыргæнæндон у йæ активон архайæг. Дизайнæн бахъуыдис 5 милуан сомæй фылдæр.
Техникумы ахуыр кæнынц 1800 студенты. Цалцæджы рæстæг ахуырадон процесс урæд не *рцыдис, æххæст æй кодтой æндæр техникумты. Мæйы кæрон æй фæнд кæнынц цалцæггонд агъуыстыты райдайæн. Уымæ æнхъæлмæ кæсынц студенттæ дæр.
Тагъд рæстæг подрядон куыстуат райдайдзæн бындурон цалцæджы дыккаг къæпхæн. Уымæ хауынц куыстытæ дыккаг уæладзыджы административон хайы, стæй фыццаджы фылдæр агъуыстыты. Ахуыргæнæндоны рацарæзт æххæстгонд цæуы национ проект «Фæсивæд æмæ сывæллæттæм»-æм гæсгæ.
