Ома, студенттæ теоретикон зонындзинæдтæ исынц ахуыргæнæндоны, практикæ та – алыхуызон куыстуæтты
Дзæуджыхъæуы политехникон техникумы 7-æм аз кусынц дуалон ахуырады программæмæ гæсгæ. Ома, студенттæ теоретикон зонындзинæдтæ исынц ахуыргæнæндоны, практикæ та – алыхуызон куыстуæтты. Уый фæрцы фæсивæдæн сæ бон у фидæны дæсныйадимæ хуыздæр базонгæ уæвын, сæхи хорз куы равдисой, уæд та ма æвæстиатæй куысты бынат дæр ссарын. Программæйы хатдзæгты тыххæй радзурдзæн Хъайтмазты Дзерассæ.
Дзæуджыхъæуккаг политехникон техникумы студент Чехойты Арсен 6 мæйæ фылдæр фæллой кæны стадион «Спартачы». Лæппу 2 азы размæ равзæрста электрикы дæсныйад. Куыд зæгъы, афтæмæй ацы хъуыддаг йæ зæрдæмæ цæуы. Кусы, стадионы трибунæты бын агъуыстыты. Нырма уал студент фæллой кæны фæлтæрдджын специалистты цæстдардæй. Йæ ныхæстæм гæсгæ, йæ фæндыд, куыд гæнæн ис, афтæ раздæр практикон фæлтæрддзинад райсын æмæ йæ дæсныйад хуыздæр базонын.
Чехойты Арсен Дзæуджыхъæуккаг политехникон техникумы иннæ студенттимæ иумæ стадион «Спартачы» кусын райдыдта дуалон ахуырадмæ гæсгæ. Уый æрмæст практикæ нæу, фæлæ ма куысты бынат райсыны хорз гæнæн.
Ныртæккæ объекты кусы 10 студенты. Практикæйы рæстæг стыр куыст не *ххæст кæнынц, фæлæ у тынг ахсджиаг, куыд куыстдæттæгæн, афтæ фæсивæдæн дæр. Фæлтæрддзинадæй фæстæмæ ма исынц мызд дæр.
Техникумы дуалон ахуырады программæмæ гæсгæ кусынц 2017-æм азæй фæстæмæ. Уымæ гæсгæ студенттæ ахуыргæнгæйæ дæргъвæтин рæстæг фæллой кæнынц куыстуаты. Программæйы архайды рæстæгмæ куысты бынæттæ райстой сæдæгай ахуырдзаутæ алы къабæзты.
Ныртæккæ дуалон ахуырады программæмæ гæсгæ фæллой кæнынц 150 студентæй фылдæр. Политехникон техникумæн бадзырдтæ ис республикæйы 50 куыстуатимæ. Уый студенттæн дæтты, сæхи равдисыны æмæ практикон фæлтæрддзинад райсыны фадат.
