Санкт-Петербургæй специалисттæ бирæ рæстæг агуырдтой сæрмагонд ахорæнты хуызтæ
Дзæуджыхъæуы Сыгъдæг Иоанн Æфсæддоны номыл аргъуаны дарддæр цæуынц аивгæнæн куыстытæ. Санкт-Петербургæй специалисттæ бирæ рæстæг агуырдтой сæрмагонд ахорæнты хуызтæ. Уый тыххæй бæрæг кодтой алыхуызон сыгъдæг бынæттæ æмæ аргъуантæ. Нывгæнджытæ пайда кæнынц, абарæн кæмæн нæй, ахæм æрмæгæй. Куыд зæгъынц, афтæмæй нывтæ æнæ реставрацийæ лæудзысты сæдæ азы онг. Уымæй дарддæр архайынц традицион чырыстон нывтæ национ аууæлтимæ баиу кæныныл. Куыд сын æнтысы, уый тыххæй бæлвырддæр радзурдзæн Фидараты Маринæ.
Фæстаг афæдзы рдæгмæ сыгъдæг Иоанн Æфсæддоны номыл аргъуаны алыварс территори зынгæ фæаивдæр. Рæсугъд æмæ сыгъдæг газонтæ, гранитæй къæйдур. Мастертæ архайныц къултæ саив кæныныл. Фæлæ æппæтæй зындæр æмæ лыстæгдæр куыст цæуы мидæгæй. 9 нывгæнæджы Санкт-Петербурджы аргъуанты аивады æрмадзæй зæрдиагæй архайынц аргъуан барæсугъд кæныныл.
Фарон сæрды мастертæ скодтой Чырыстийы æмæ зæдты сурæттæ. Ныртæккæ та куыстытæ цæуынц быннаг рæнхъыты. Сæрмагонд ахорæнтæй цы сурæттæ ныв кæнынц, уыдонæн æнæ реставрацийæ сæ бон уыдзæн сæдæ азы фæлæууын.
Аргъуаны алы символæн дæр ис йæхи нысаниуæг – ам æвиппайды ницы фæзынд. Чи йыл кусы, уыдоны иумæйаг хæс у чырыстон традицион сурæттæ æмæ национ æууæлтæ баиу кæнын. Æнцон хъуыддаг нæу, фæлæ ацы специалисттæн сæ бон бауыдзæн.
Санкт-Петербургаг нывгæнджытæ семæ сластой, абарæн кæмæн нæй, ахæм ахорæнты палитрæ. Сæрмагондæй арæзт æрцыд Иоанн Æфсæддоны номыл аргъуанæн, Новый Афоны Сыгъдæг Пантелеймоны номыл аргъуан куы бабæрæг кодтой, уый фæстæ.
Куыстытæ сæ тæмæны бацыдысты, хуыцауы номыл куывдтытæ аразæн залы. Колоннæтæ æмæ дзуæртты нывты бынат аив кæнынц бынæттон дурæй алайнаг символтимæ. æддаг бакаст та авигонд цæуы урс мраморæй.
Аргъуан кусы алы бон. Вæййынц дзы службæтæ, стæй кусы дины скъола дæр. Бæстыхайы æддаг бакастыл Александр Невский сурæт. Сыгъдæг удты рæнхъытæ баххæст кодта 16-æм æнусы. Йæ фарсмæ та бындур æвæрд æрцыд йæ нана – Мария-Ясыняйы номыл кувæн бынатæн.
