Скодтой йын протез
Дзæуджыхъæуы сырддоны баххуыс кодтой дзæбидырæн. Скодтой йын протез. Цæрæгойы сырддонмæ цæфтæй æрбаластой зымæджы. Бахауд къæппæджы, æмæ тынг хъыгдард баййæфта йе нцойгæнæн къах. Сырддоны специалисттæ агуырдтой мадзæлттæ, дзæбидырæн баххуыс кæныны тыххæй. Сæ курдиат бахастой Налцыччы ветеринартæм. Афтæмæй цæрæгойæн сæвæрдтой протез. Æмæ ныр уый фæрцы дзæбидырæн йæ бон ногæй у цæуын
Стыр къалати, мидæгæй та хæдзар. Йæ рудзынгæй рæстæгæй-рæстæгмæ дунемæ рафæлгæсынц дзæбидыр Олежæйы цымыдис цæстытæ. Бирæтыл нырма не ууæнды, уымæн æмæ тæрсы, ногæй та къæппæджы куы бахауа, уымæй. Фæлæ йын Дзæуджыхъæуы сырддоны кусджытæ ныридæгæн систы хиуæтты хуызæн. Дзæбидыримæ фæхъазынц, раттынц ын хæринаг, стæй ма йæ ирон æвзагыл дæр ахуыр кæнынц.
Уæвгæ, ног цардыл сахуыр уæвын дзæбидырæн æнцон хъуыддаг нæ уыди. Фыццаджыдæр уыд тынг цæф, стæй ма адæмæй дæр тарсти. Ныртæккæ та йæхи æндæрхуызон дарын райдыдта. Ныр Олежæмæ кæсгæйæ, зын бауырнæн у, æрæджыдæр ма хъæддаг цæрæгой тарст кæй уыди, уый. Цæры æхгæд вольеры, йæхи æвдисы активонæй. Иннæ аз æй хъуамæ раивой æндæр фæзмæ. Къæппæджы бахаугæйæ, Олежæ асаста йе нцойгæнæн къах. Бахъахъхъæныны фадат ын нæ уыд, æмæ уæд специалисттæ райдыдтой æндæр гæнæнтæ агурын. Æххуысмæ æрбацыдысты Кæсæг-Балхъарæй специалисттæ. Ветенринартæ зæгъынц, æппæт операцитæн æмæ иумæйаг наркозæн дзæбидыр бафæрæзта иттæг хорз.
Операцийы фæстæ дзæбидыр йæ протезыл ахуыр нæ уыд, æмæ тыхсти. Бæрæг уыди, хъыгдаргæ йæ кодта, уый. Фæлæ рæстæг куыд цыди, афтæ йыл ахуыр кæнын райдыдта.
Дзæбидыр Олежæйы реабилитаци нæма фæци. Разæй йæм нырма æнхъæлмæ кæсынц зындзинæдтæ. Фæлæ сыл кæй фæтых уыдзæн, ууыл зæрдæ дарæн ис. Протезыл сахуыр уæвын – уый иу, стæй ма ногæй адæмыл дæр æууæндын райдайын, – уый та иннæ ахсджиаг хъуыддаг.
