Æрбахуыдтой республикæйы скъолаты ахуырдзауты
Джеоргуыбайы бæрæгбоны къуыри базарадон-экономикон колледжы традицимæ гæсгæ сарæзтой гом дуæртты бон. Æрбахуыдтой республикæйы скъолаты ахуырдзауты. Рæзгæ фæлтæр базонгæ сты ирон æгъдæуттимæ æмæ бацархайдтой цымыдисаг конкурсты. Бæлвырддæр хабæрттæ радзурдзæн нæ уацхæссæг Хъайтмазты Дзерассæ.
Скъоладзауты къухты фæлмæн хыссæ райсы бæлвырд формæ. Чъиритæ фыцыны конкурс – бæрнон хъуыддаг у. 8-æмкъласон Хъуппеты Беллæ ерысы фыццаг хатт архайы.
Джеоргуыбайы бæрæгбоны къуыри базарадон-экономикон колледжы традицимæ гæсгæ сарæзтой скъоладзаутæн гом дуæртты бон. Уый сын фадат дæтты бæрæгбоны мадзæлтты бацархайынæн, стæй сæ арæхстдзинад сфæлтæрынæн дæр. 11 чызджы ерыс кодтой 3 хуызы чъиритæ æмæ кæрдзын цæттæ кæныны.
Ирон адæмы культурæ æмæ æгъдæуттимæ баст конкурсты бацархайыны нысанимæ колледжмæ æрбацыдысты республикæйы 15 скъолайæ ахуырдзаутæ.
Мадзал бабæрæг кодтой, республикæйæ мобилизацигонд чи æрцыд, уыдоны, стæй 58-æм æфсады хæстонты сывæллæттæ дæр. Базонгæ сæ кодтой национ традицитимæ, уыд сын фадат ирон культурæйы арф мидис банкъарынæн.
Конкурсты уæлахиздзауты хъуамæ сбæрæг кæна экспертон жюри. Сывæллæттæ куыд зæгъынц, афтæмæй фæуæлахиз уæвын æхсызгон у, фæлæ сæйрагдæр у ахæм хъæугæ мадзалы бацархайын.
