Цæгат-Кавказаг фронты 56-æм æфсады мысанæхсæн полчы рæстдзæвин сгуыхтдзинад равдыста Керчы операцийы рæстæг
Джызæлы 2-æгæм скъолайы къулыл фæзындзæн Советон Цæдисы Хъæбатыр Доййаты Давиды портрет. Цæгат-Кавказаг фронты 56-æм æфсады мысанæхсæн полчы рæстдзæвин сгуыхтдзинад равдыста Керчы операцийы рæстæг. Уый нымад у æппæтæй тугкалæн тохыл, Хъырым уæгъд кæнгæйæ. Ныхмæлæууæджы контратакæты рæстæг ирыстойнаг лæппу Доййаты Давид снайперон æхстытæй скуынæг кодта 12 объекты, стæй 25 салдаты æмæ офицеры. 12-æм ноябры 1943-æм азы старшина хъæбатырæй фæмард. Ныгæд æрцыд Керчы. Доййаты Давиды ном ныртæккæ хæссы Хъæбатыр-горæт Керчы 26-æм скъола.
Арæзтадон хъæдты *хсæнæй ныридæгæн бæлвырд зыны Советон Цæдисы хъæбатыры фæлгонц. Фæлмæн мидбылхудтимæ æмæ хъарм цæстæнгасимæ. Ахæм зæрдæйы ахастимæ Доййаты Давид фæцард йæ цыбыр цард. Скъолайы къулыл йæ портрет сныв кæнын у аразæджы хъæппæрис. Ахуыргæнæндон цалцæггæнгæйæ æвиппайды бамбæрста, скъола кæй ном хæссы, уый фæлгонц хъуамæ алчидæр уына.
Ныфсхаст, хъæбатыр, æмæ цыма æппындæр ницæмæй тарст. Тырныдта Уæлахизмæ. Сси æцæг хæстоны æмæ адæймаджы дæнцæг. Йæ ном цы скъола хæссы, бацæуæны æвæрд бюст, разуындыл портрет. Уыдон иууылдæр сты йæ намысы символтæ. Йæхиуыл нæауæрдгæйæ, Фыдыбæстæйы сæрибардзинадыл куыд тох кодта, уый æвдисæнтæ.
Доййаты Давиды йæ райгуырæн хъæуы никуы рох кодтой. Джызæлы уынгтæй иу хæссы йæ ном. Федералон трассæ Дзæуджыхъæу-Алагиры та йын сæвæрдтой цыртдзæвæн. Бæрзонд æмæ хæрзконд. Цыма, Фыдыбæстæйы Стыр хæсты рæстæг куыд уыдис, афтæ та йæ райгуырæн зæхх хъахъхъæны, уый хуызæн.
Цæгаткавказаг фронты 56-æм æфсады 1133-æм æхсæн полчы снайпер фесгуыхт Хъырым уæгъдгæнгæйæ. Ныхмæлæууæджы контратакæйæн ныхкъуырды рæстæг уый йæ снайперон æхстæй ныппырх кодта 12 æхсæн бынаты, знаджы 25 салдаты æмæ афицеры. Доййаты Давид фæмард хутор Джанкойы тохы. Баныгæдтой йæ Керчы. Абон йæ ном хæссы горæт-хъæбатыр Керчы 26-æм скъола.
Куы фæцæф ис, уæд дæр йе *хстæй не рлæууыд. Знагæн ныхкъуырд лæвæрдта йæ фæстаг сулæфты онг. Доййаты Давид бæлвырд зыдта, Фыдыбæстæмæ уарзондзинад куыд тыхджын у, уый. Æнустæм баззад бæстæйы историйы, куыд Райгуырæн бæстæйыл иузæрдион æмæ æгæрон уды тыхимæ адæймаг.
