Программæ уыди тынг ирд æмæ цымыдисаг
Дзуарыхъæуы аграрон гыццыл хъæуы парахатæй сбæрæг кодтой цæрвкъахæнтæ. Лауызтæ, кæфтытæ, зарджытæ, æрмдæсныты армукъа, дæсныйадæвдисæг ахуыртæ… Программæ уыди тынг ирд æмæ цымыдисаг. Бæрæгбоны уыди не сфæлдыстадон къорд дæр. Бæстондæр радзурдзæн Касаты Наирæ.
Паддзахадон ансамбль «Теркаг хъазахъхъæгты» зарджытæй райдыдтой бæрæгбоны мадзæлттæ. Цæрвкъахæнтæ сты сæ тæккæ тæмæны. Цæттæ кæнынц хæрзад лауызтæ. Сæ фарсмæ традицион чъиритæ, æмæ æндæр национ хойрæгтæ. Адæм исынц сæ къамтæ, иу ныхасæй – уалдзæг æрцыд.
Сæдæгай уазджытæ цæрвкъахæнтæ сбæрæг кæнынмæ æрбацыдысты Дзуарыхъæуы гыццыл агрономон хъæумæ. Арæзт æрцыди фарон, амалхъом адæймаг Беккуызарты Ларисæйы хъæппæрисæй. Бизнес-проект ныридæгæн йæхи равдыста æнтыстджынæй. Комплекс зæрдиагæй бабæрæг кæнынц туристтæ. Фæлладуадзджытæн ам фадат вæййы сæхи æграрон кусджытæй банкъарынæн – хъуг æрдуцын, цыхт бацахсын, æхсыры сæртæ æмæ æндæр æхсыры продукци бакусгæйæ. Бæрæгбоны та аграрон чысыл хъæу сси йæ фæллад суадзын пайдаимæ кæй фæндыди, уыдонæн иттæг хорз бынат.
Уазджыты размæ цы хойраг рахастой, уый у бæрæгбоны ахсджиаг хай. Уалдзæгыл сæмбæлын хъæуы дзаг фынгæй. Волонтертæ уыдысты Хæххон паддзахадон аграрон университеты æмæ базарадон-экономикон техникумы студенттæ. Кæд боныхъæд уазал у, уæддæр уазджытæ уый не нкъарынц. Раздæр иу цæрвкъахæнты традицимæ гæсгæ басыгътой зымæджы быдыргъ, йæ нысан уыди цæмæй тагъддæр фæхъарм уа æмæ æрдз райхъал уа. Ацы хатт дæр уыдзæн афтæ. Фæлæ уал нырма дарддæр цæуы бæрæгбоны циндзинад. Суриковы номыл аивæдты институты рауагъдон Деметы Ибрагим бирæ азты кæны æрмæст скульптурæ æмæ керамикæйы куыст нæ, фæлæ ахуыр кæны сывæллæтты дæр. Йæ къухты æлыг райсы формæ æмæ байдзаг вæййы мидисæй. Бæрæгбоны нывгæнæг скодта лæвар дæсныйадæвдисæг ахуыртæ.
Армукъайы сæ продукци равæрдтой бирæтæ. Равæрдтой дзы национ сувениртæ, алы культурæты æнгом бастдзинад кæдфæндыдæр вæййы аив. Армукъайы уыдис алцыдæр – цайæ райдай æмæ косметикæйæ фæуы.
Зымæг хъæлдзæгæй арвитын у хъарм æмæ тыллыгджын уалдзæджы бындур. Æмæ кæд уыцы хъуыды раст у, уæд дарддæр алцыдæр уыдзæни хорз.
