Ист æм æрцыдысты курдиатджын сывæллæттæ æппæт районтæй.
Фарон республикæйы физикон-математикон лицей-интернаты байгом кодтой эксперименталон кълас. Ист æм æрцыдысты курдиатджын сывæллæттæ æппæт районтæй. Бирæты кæй бафæндыд ам ахуыр кæнын, уымæ гæсгæ та ныридæгæн систы дыууæ къласы. Ахуыргæнæндон бабæрæг кодта не сфæлдыстадон къорд, æмæ ныхасы бар Сосранты Жаннæйæн.
Республикæйы физикон-математикон лицей-интернат бирæ азты сæрмагондæй цæттæ кæны, нымайынмæ сæ курдиат здæхт кæмæн у, ахæм скъоладзауты. Сæ арæхстдзинад фылдæр кæнынæн та ма сын æххуыс сты, афæдзы дæргъы дзы цы уæлæмхасæн къордтæ кусынц, уыдон.
Куыд ахуыргæнджытæ, афтæ ахуыргæнинæгтæ дæр æмбарынц, математикæ биноныгæй цæмæй базонай, уый тыххæй хъæуы бирæ рæстæг архайын æмæ кусын. Дæнцæгмæ та сæ дардмæ цæуын нæ хъæуы. ЦИПУ-йы хуыздæр студент Хъалæгаты Хетæг сæ зонгæ кæны математикæйы гæнæнтимæ, куыд зæгъы, афтæмæй ацы сæрмагонд къордтæ æнæмæнг хорз æрхъуыды сты.
Лицейы ма ис фадæттæ Цæгат Ирыстоны дæрддзæф хъæуты цæрæг сывæллæттæн. Ам вæййынц æхсæвыгон дæр, уыдон та ма математикæйæ уæлæмхасæн къордæй уæлдай фæархайынц кванториумы дæр.
Ам сывæллæттæ цы программæйыл ахуыр кæнынц, уый сарæзтой ахуыргæнæндоны педагогтæ сæхæдæг. Ацы ахуыргæнæндоны фæрцы, зæрдæ дарæн ис, фидæны фылдæр математиктæ кæй фæзындзæн Ирыстоны, ууыл.
