Республикæйы Сæргълæууæг бабæрæг кодта муниципалон скондты Советы æрвылазон æмбырд
Фылдæр гæнæнтыл архайын. Ахæм хъуыды Сергей Меняйло фехъусын кодта муниципалон кусджытæн. Республикæйы Сæргълæууæг бабæрæг кодта муниципалон скондты Советы æрвылазон æмбырд. Регионы разамонæг куыд бафиппайдта, афтæмæй районты администрацитыл ис, сæ муниципалон скондты рæзтыл кусыныл бæрнон хæс æвæрд. Уый тыххæй та хъуамæ активонæй архайой федералон æмæ республикон программæты. Се хсæн – æхсæнадон территориты аивдзинад, хъæуты райрæзт, стæй национ проекттæ царды уадзын. Сергей Меняйлойы ныхæстæм гæсгæ, æппынæдзухдæр хъæуы бынæттон цæрджытимæ æмархайд кæнын. Хорз бæрæггæнæнтæ та къухы бафтдзысты иумæйаг хъарутæй архайгæйæ, æмæ иумæйаг системæйыл бакусгæйæ. Ивгъуыд азы куысты бæрæггæнæнтыл бæстон доклад скодта Советы сæрдар Нæкуысаты Барис. Куыд загъта, афтæмæй Цæгат Ирыстон активонæй архайы хуыздæр муниципалон сконды конкурсы. Совет кусы 2006-æм азæй фæстæмæ. Йæ хыгъды ис 111 муниципалон сконды. Республикæйы разамонæг се ппæтæн дæр раарфæ кодта сæ профессионалон бæрæгбоны фæдыл æмæ муниципалон кусджытæн радта хæрзиуджытæ. Нæкуысаты Барисæн та лæвæрд æрцыд майдан, Кировы районы бынæттон хиуынаффæйады рæзты тыххæй.
