Мадзал ацыд Валерий Халиловы æппæтадæмон музыкалон фестивалы программæмæ гæсгæ, æмæ баст уыд зындгонд æфсæддон дирижер æмæ композитор Василий Агапкины 140 азы бонимæ
Гергиты Валерийы номыл аивæдты колледжы арæзт æрцыд ахуырдзауты концерт. Мадзал ацыд Валерий Халиловы æппæтадæмон музыкалон фестивалы программæмæ гæсгæ, æмæ баст уыд зындгонд æфсæддон дирижер æмæ композитор Василий Агапкины 140 азы бонимæ. Уæ зæрдыл уын æрлæууын кæндзыстæм, Уæрæсейы сæйраг æфсæддон дирижер Валерий Халилов фæсард авиафыдбылызы 2016-æм азы. Музыкæ йын уыд йæ царды сæйрагдæр хъуыддаг. Йæ рæстæджы стыр æвæрæн бахаста музыкалон аивадмæ. Азтæ цæуынц, фæлæ Валерий Халиловы ном рох нæу. Фестиваль арæзт фæцæуы алы горæтты. Дзæуджыхъæуы концерты программæмæ хаст æрцыдысты Халиловы уацмыстæ, райдай классикæйæ æмæ нырыккон музыкæйæ фæуы. Цæгат Ирыстон фестивалы архайы фыццаг хатт. Аивадуарзджыты размæ сæ курдиат рахастой æрыгон музыканттæ. Уыдонæн фестиваль радта сæ фæлтæрддзинадыл бафтауыны фадат дæр.
