Арæзт сты сывæллæтты технопарк «Кванториумы» хъæппæрисæй
Горæтгæрон районы скъолаты «Точка роста»-йы педагогтæн аразынц сæ фæлтæрддзинад фылдæргæнæн курсытæ. Арæзт сты сывæллæтты технопарк «Кванториумы» хъæппæрисæй. Ныр, фыццаг курсытæ ацыдысты Горæтгæрон районы. Дæллаг Санибайы æрæмбырд сты æнæхъæн районы «Точка роста»-йы педагогтæ. Ахуыр сæ кодтой нырккон технологитæй архайыныл. Уыдон сты: 3Д принтертæ, робото – техникон æмбырдтытæ, къамисæнтæ, микрофонтæ, стæй монтажгæнæн программæтæ. Проект фæзынд республикæйы ахуырады æмæ наукæйы министрады, стæй фæсивæды хъуыддæгты комитæты фæрцы. Ахуырты педагогтæ базондзысты, «Точка роста»-мæ сын цы технологитæ æрбаластой, уыдонæй архайын. Кæй зæгъын æй хъæуы, ахуыртæ сты практикон. Уыцы ахуыртæй уæлдай ма цæттæ сты фидæны дæсныйæдты методикон куыстытæ. Мæйы кæронмæ курсытæ ацæудзысты республикæйы æппæт районты.
Ирина Кибирева, Дæллаг Санибайы скъолайы ахуыргæнæг: «Ахæм курсыты фыццаг хатт стæм. Алцыдæр нын амонынц тынг лæмбынæг. Ис нæм медиацентр. Йæ кусæнгæрзтимæ куыд архайын хъæуы, ууыл нæ ахуыр кæндзысты. Фæнды мæ, цæмæй нын ахуыргæнджытимæ ахæм фембæлддæ арæхдæр куыд уой, уый».
Дзебысаты Георгий, Камбилеевскæйы 1-æм скъолайы ахуыргæнæг: «Æрбацыдтæн мæ зонындзинæдтæ фæуæрæхдæр кæнынмæ, уымæн æмæ ахуыргæнæг хъуамæ бирæ зона, цæмæй сывæллонæн исты бацамона, уый тыххæй».
