Мадзалы архайдтой РЦИ-А-йы ахуырад æмæ наукæйы министр Алыбекты Эллæ, институты разамонджытæ, ахуыргæнджытæ æмæ профилон кълæсты ахуырдзаутæ
Цæгат Кавказы хæххон-металлургон институты цы æмбырд ацыд, уым æрдзырдтой инженерон кълæсты куыстыты рæстæг цы фарстатæ æмæ æнтыстдзинæдтæ фæзынынц, уыдоныл. Мадзалы архайдтой РЦИ-А-йы ахуырад æмæ наукæйы министр Алыбекты Эллæ, институты разамонджытæ, ахуыргæнджытæ æмæ профилон кълæсты ахуырдзаутæ. Куыд ахадынц ахæм кълæстæ скъоладзаутыл, уый тыххæй радзурдзæн Тъехты Элинæ.
Цы сты шамот æмæ шербер æмæ цæмæн хъæуынц? Профилон инженерон кълæсты ахуырдзаутæ уыцы зонындзинæдтæ райсынц практикæйы рæстæг. Стайын кæнынц сыгъзæрин æмæ æвзист. Ныридæгæн скъоладзаутæ ахуыр кæнынц, хæххон металлургон институты 3-æм курсы студенттæ цы ахуыр кæнынц, уый. Цалынмæ иутæ згъæрæй сыгъзæрин æмæ æвзист исынц, уæдмæ иннæтæ та æмбырд кæнынц электрон тыхы схемæ. Скъоладзаутæм раздæр зын цы куыстытæ кастысты, уыдон ныр арæхстджынæй кæнынц. Институты къуыри вæййынц иу хатт.
Профилон кълæсты чи архайы, уыдонæй бирæтæ фæнд кæнынц хæххон металлургон институтмæ бацæуын æмæ инженерон аивадимæ сæ цард сбæттын. Проект дæр уымæн арæзт у. Куыстыты рæстæг цы фарстатæ æмæ æнтыстдзинæдтæ фæзынынц, уыдоныл æрныхас кодтой æмбырды.
Ахæм кълæсты ахуыргæнгæйæ скъоладзаутæн фадат ис алы дæсыйадты сæхи бафæлварын. Уыдоны руаджы равзардзысты, сæ цард сæ цы дæсныйадимæ сбæттын фæнды, уый.
