Домаг, фæлæ уыцы иу рæстæг фæлмæнзæрдæ, иу æмæ дыууæ фæлтæры не схъомыл кодта
Хæзныдоны скъолайы байгом мемориалон фæйнæг физикæйы ахуыргæнæг Бетанты Авдийы номыл. Домаг, фæлæ уыцы иу рæстæг фæлмæнзæрдæ, иу æмæ дыууæ фæлтæры не схъомыл кодта. Кадджын мадзалмæ æрбацыдысты, скъола 50 азы размæ каст чи фæци, уыдон. Дзырдтой сæ зондамонæгимæ баст мысинæгтæ. Ахуыргæнæндон та тагъд рæстæг сбæрæг кæндзæн йæ 100 азы бон. Бæлвырддæр хабæртт радзурдзæн Чехойты Фатимæ.
Йæ уроктæн рохгæнæн нæй. Гегкиты Алибек Хæзныдоны скъолайы кусы 40 азы дæргъы. У физикæйы ахуыргæнæг. Педагогон фæндаг равзæрста йæ зондамонæг Бетанты Авдиймæ гæсгæ. Физикæмæ уарзондзинад дæр йæ зæрдæйы уымæ гæсгæ сæвзæрд.
Бетанты Авдий йæ дæсгай азты педагогон куысты тыххæй бирæ хатт æрцыд хорзæхджын. Кад ын кодтой æрмæст скъоладзаутæ нæ, фæлæ иннæ ахуыргæнджытæ дæр. Домаг æмæ уыцы иу рæстæг фæлмæнзæрдæ, уыд дæнцæг фæсивæдæн. Ныр та йын йæ ном базыдтой æрыгон фæлтæры минæвæрттæ. Физикæйы цымыдисаг фæлтæрæнтæ сывæллæттæ цы къласы феххæст кæнынц , уым байгом кодтой йæ ныв æмæ йæ царды хабæрттимæ мемориалон фæйнæг.
Ам сæмбырд сты, Хæзныдоны скъола 50 азы размæ каст чи фæци, уыдон. Алкæмæндæр сæ сæ зæрдыл æрлæууыдысты сæ уарзон ахуыргæнæгимæ баст мысинæгтæ.
Мадзал сарæзтой Хæзныдоны скъолайы юбилейон азы фæлгæты. Сентябры ахуыргæнæндон сбæрæг кæндзæн йæ 100 азы бон. 1920-æм азты райдиан скъолайæн æвзæрст æрцыд хъæуы хæдзæрттæй иу. Уымæй 10 азы фæстæдæр байгом астæуккаг скъола. 1991-æм азæй сывæллæттæ зонындзинæдтæ исынц ног , стыр бæстыхайы. Хæзныдоны скъолайы рауагъдонтæ зындгонд сты æхсæнады алы къабæзты. Ахуыргæнджытæ æдзух æнувыд уыдысты скъоладзаутыл, æрыгон фæлтæрмæ сæм ахæм ахаст ис ныр дæр.
Хæзныдоны скъола сывæллæттæ хонынц сæ фидæн æмæ сæ зæрдæ. Ахуыргæнæндоны цæстыгагуыйау хъахъхъæнынц уарзон зондамонджытимæ баст мысинæгтæ. Скъолайы руаджы ахуырдзаутæ ныфсджынæй кæсынц райсомы бонмæ.
