Ацы хатт ыл бакуыстой Дагестаны паддзахадон хъуымыхъаг музыкалон-драмон театры артисттæ, æмæ йæ равдыстой Тæбæхсæуты Балойы номыл Ирон академион театры
Хетæгкаты Къостайы райгуырæн боны кадæн, йе нæмæлгæ поэмæ «Фатимæ» ногæй сценæйы. Ацы хатт ыл бакуыстой Дагестаны паддзахадон хъуымыхъаг музыкалон-драмон театры артисттæ, æмæ йæ равдыстой Тæбæхсæуты Балойы номыл Ирон академион театры. Спектаклы режиссер-æвæрæг у Цæгат Ирыстоны адæмон артист Уалыты Гиви. Абон постановкæ фендзысты Хуссар Ирыстоны, уый фæстæ та Махачкалайы. Бæлвырддæр хабæрттæ радзурдзæн Хъайтмазты Дзерассæ.
Уарзондзинад та ногæй ссыгъд Фатимæ æмæ Дзамболаты хсæн Цæгат Ирыстоны паддзахадон академион театры сценæйы. Фæлæ йын ацы хатт йæ цæхæр ссыгъдтой Дагестаны паддзахадон хъуымыхъхъаг музыкалон-драмон театры артисттæ. æнæнхъæлæджы музыкæ ныссабыр, хъуысынц рæмыгъдтытæ: райдыдта Кавказаг хæст.
Фатимæйы зæрдæ рыстæй байдзаг. Дзамболат хæстæй не рыздæхт. Бирæ рæстæг æй нымадтой æбæрæгæй сæфтыл, уый та уацары бахауд.
Уацмыс драматизмæй æххæст у. Амондджын кæронбæттæн ын нæй. Поэмæ «Фатимæ» ирдæй æвдисы рагон тызмæг хæххон æгъдæуттæ, сылгоймаджы бынат уыцы уагæвæрды. Ирд костюмтæ, декорацитæ, актерты хъазт. Хъуымыхъхъаг музыкалон-драмон театры труппæ сæрмагондæй бацархайдта уæды рæстæджы хицæндзинæдтæ равдисыныл. «Фатимæ» официалон æгъдауæй бацыд сæ репетуармæ. Ныр æй равдыстой Цæгат Ирыстоны дæр. Фендзысты йæ Хуссар Ирыстоны аивадуарзджытæ дæр.
Хъуымыхъхъаг театры гастрольтæ баст сты Хетæгкаты Къостайы райгуырды боны 167 азимæ. Цæгат Ирыстоны паддзахадон академион театр ахадгæйæ архайдта спектакль цæттæ кæныны, зæгъы йæ аивадон разамонæг Уалыты Гиви. Артисттæ репетици кодтой сæхи фæзы дæр æмæ Дзæуджыхъæуы дæр. Ирон театрдзауты размæ «Фатимæ» рахæссын сын бæрнон хъуыддаг у.
Залы – аншлаг. Аивадуарзджытæ сценæйæ цæст нæ исынц. Дагестайнаг театры равдыст ирон театрдзауты зæрдæмæ ссардта фæндаг.
Нæ сыхæгтæ се ппæтæн уарзон поэмæ «Фатимæ» равдыстой ног хуызы, фæлæ йын æнæмæнг аргъ кæнгæйæ. æмæ цалынмæ сценæйæ хъуысынц Хетæгкаты Къостайы æнæмæлгæ рæнхъытæ, уæдмæ 2 республикæйы хсæн культурон бастдзинад кæндзæн фидардæр.
