Национ музейы галерейы байгом йæ куыстыты равдыст
Ирон адæмы традицион цардыуаг, национ сурæттæ æмæ зонгæ пейзажтæ сты нывгæнæг Кокайты Константины сфæлдыстады бындур. Национ музейы галерейы байгом йæ куыстыты равдыст. Хæдзары дзаумæттæй рауайын кодта инсталляцитæ, æрвылбоны сюжеттæй та – зæрдæмæдзæугæ историтæ. Равдыст бабæрæг кодта не сфæлдыстадон къорд. Ныхасы бар Чехойты Фатимæйæн.
Хуымæтæг нас ам свæййы историйы хай. Раджы заманы-иу æй куы-иу бахус кодтой, уæд дзы-иу рауадис рог мигæнæн донæн, кæнæ æндæр хойрæгтæн. Ахæм хæдзары дзаумæттæй Кокайты Константин скæны инсталляцитæ – афтæ ног хуызы дзуры Ирыстоны культурæ æмæ традицитыл. Нывгæнæджы ныхæстæм гæсгæ, куыст саразыны хъæппæрис фæзыны æвиппайды. æмæ кæд сурæт цæстытыл ауайы, уæд æй фæфæнды саразын цыбыр рæстæгмæ.
Йæ композициты автор равдисы Нарты кадджытæ, ирон царды уаг, зонгæ национ сурæттæ. Нывкæнынады сюжеттæ та ссары йæ алыварс. Йæ куысты *хсæн – Беслæны пейзажтæ, бынæттон цæрджытæ уыдон фенгæйæ, базондзысты сæ уынгтæ. Нывгæнæгæн ахсджиаг у равдисын æрмæст бынат нæ, фæлæ йæ уавæр дæр. Нæ разы – хуымæтæг традицион ирон фынг нæ, фæлæ цардæй ист сценæ. Ам ис чъиритæ, дзидза, нозт – уазджыты иу фынгмæ чи *рæмбырд кæны, ахæм хойрæгтæ. Йæ фарсмæ та – кафджытæ. Куы сæ разила, уæд цыма чысыл композицийы уд бауагъта, афтæ зыны. Иу инсталляцийы нывгæнæг баиу кодта ирон культурæйы цалдæр зонгæ символы – уазæгуарзондзинад, фынджы æгъдау æмæ кафт. Йæ равдыст схуыдта «Рæстæджы афонтæ». Йæ ныхæстæм гæсгæ, æрдзмæ æвзæр боныхъæд нæй. Хурбон, асæст, кæнæ мигъ – нымайы нывгæнæджы ифтонггæрзтæ райсыны фадатыл. Кокайты Константины куыстыты бæрæг дары импрессионализмы комулæфт.
Кокайты Константин каст фæци Цæгат Ирыстоны аивадон училищæ, фæстæдæр ахуыр кодта Харьковы «Интерьер æмæ оборудовани»-йы хайады. Уым цы зонындзинæдтæ райста, уыдон ын æххуыс сты тыгъдад равдисынæн, стæй композици банкъарынæн. Кокайты Константин у алыхуызон равдыстыты æмæ конкурсты архайæг. 2012 азы та сси Уæрæсейы нывгæнджыты Цæдисы уæнг.
Кокайты Константин йæ размæ аивадуарзджытæн æрмæст йæ куыстытæ равдисыны хæс не *вæры. Фæнды йæ, цæмæй адæймаг æрлæууа, зонгæ хъуыддæгтыл лæмбынæг йæ цæст ахæсса, гæнæн ис, æмæ йæ уæд бафæнда исты саразын. Нывгæнæджы хъуыдымæ гæсгæ, сфæлдыстад арæх стыр хъæппæрисæй нæ райдайы. Хатгай фаг вæййы фенын рæсугъд ахорæн, кæнæ зонгæ пейзаж – æмæ уыцы уысм уæд хъæуы бахъахъхъæнын четæныл.
