Гастрольтæ райдыдтой спектакль «Гæздæнтæ»-й
Тæбæхсæуты Балойы номыл Ирон академион театр æнтыстджынæй йæхи равдыста Симферополы. Гастрольтæ райдыдтой спектакль «Гæздæнтæ»-й. Ирон бинонты хъæбатырдзинад арф банкъардтой Хъырымаг аивадуарзджытæ. 9-æм майы, Уæлахизы боны та коллектив равдыста ноджыдæр иу драмон постановкæ, Борис Васильевы уацмысмæ гæсгæ æвæрд спектакль «В списках не значился». Йæ режиссер у Уалыты Гиви. Гастрольтæ фесты комедийæ «Он. Она. Окно. Покойник», режиссер Челæхсаты Эдуард. Спектаклы фæстæ Ирон театры артисттæ сæ аивадон разамонæгимæ æмæ директоримæ схызтысты сценæмæ, æмæ театрдзаутæн загътой арфæйы ныхæстæ. Уалыты Гиви фысымтæн ракодта зæрдылдарæн лæвæрттæ – национ уæлæдарæсы куклатæ. 22-æм майы та райдайдзысты дзуапдæттæн гастрольтæ. Максим Горькийы номыл Хъырымы академион театр Дзæуджыхъæуы равдисдзæн æртæ постановкæйы: «Вишневый сад», «Стоянка в Нагасаки» æмæ «Любовь в стиле барокко».
