Киноныв суыдзæн конкурсон программæ «Русские премьеры»-ы архайæг
Ирыстойнаг кинематографистты кино «Авд сау гæххæтт»-ы ис Мæскуыйы æппæтадæмон кинофестивалы номинантты хыгъды. Киноныв суыдзæн конкурсон программæ «Русские премьеры»-ы архайæг. Кино ист у ирон æвзагыл, Булкъаты Михаилы уацмысы мотивтæм гæсгæ. Архайд цæуы Фыдыбæстæйы Стыр хæсты рæстæг, гыццыл ирон хæххон хъæуы. Сюжеты сæйраг архайджытæ – сæ фыдмæ фронтæй чи æнхъæлмæ кæсы, ахæм дыууæ æфсымæры. Кæсынц æмæ уынынц, хæдзæрттæм цы хъыг хабæрттæ хъуысы æмæ сæм сау гæххæттытæ кæй цæуы, уый. Афтæмæй, лæппутæ постхæссæгæй курынц, цæмæй уый сау гæххæттытæ хъæуы цæрджытæй æмбæхса цалынмæ хæст фæуа, уæдмæ. «Авд сау гæххæтт»-ы у режиссер Колыты Анатолийы æххæстметражон дебют. Кинойы аивадон разамонæг – Клим Шипенко. Сюжет истой Къæмунтæ, Гæлиат, Махческ, Дзинага, Зæрæмæг æмæ Дзæуджыхъæуы. Сæйраг рольтæ дзы ахъазыдысты Дзæуджыхъæуы театрты актертæ. Кино прокаты рацæудзæн мæйы фæстæ. Премьерæ та уыдзæн Уæлахизы Бон.
