Лæппутæн æмæ чызджытæн дзурынц куыстуаты историйы тыххæй, цæмæй сын æнцондæр уа фидæны дæсныйад равзарын
Республикæйы куыстуæттимæ хуыздæр базонгæ уæвыны тыххæй, ивгъуыд азы кæронæй скъоладзаутæн райдыдтой профориентацион экскурситæ аразын. Лæппутæн æмæ чызджытæн дзурынц куыстуаты историйы тыххæй, цæмæй сын æнцондæр уа фидæны дæсныйад равзарын. Фидараты Маринæ радзурдзæн бæстондæр.
Фидæны хъæддзаумайы эскизтæ арæзт æрцæуынц ам, ацы цехы. Дизайнертæ, технологтæ, хъæддзаума æмбырдгæнджытæ æмæ афтæ дарддæр.Се ппæт дæр архайынц проекттæ аразыныл. Процесс æххæстæй феныны фадат фæзынд ахуырадон центр «Интеллект»-ы хъомылгæнинæгтæн. Экскурси скъоладзауты зæрдæмæ фæцыд суанг фыццаг минуттæй фæстæмæ.
Ахуырдзаутæн къæпхæнгай равдыстой куысты процесс, цехы гæнæнтæ, кусæнгæрзтæ æмæ мастерты архайд. Профориентацион экскурситæ скъоладзаутæн æмæ студенттæн аразын райдыдтой ивгъуыд аз сентябры. Арæзт фæцæуынц, федералон проект «Профминимум» æххæст кæнгæйæ. Цæгат Ирыстоны йыл бакуыстой профессионалон цæттæдзинады центр, стæй промышленносты æмæ инвестициты министрад.
Ахуыры азы кæронмæ экскурситæ арæзт цæудзысты цалдæр куыстуаты: «Кристалл», «Баспик», «Заря Осетии», «Победит», стæй ма адæмон æрмдæсныйады æрмадзты. Проекты архайынц республикæйы æппæт скъолатæ.
Проекттæ «Профминимум» æмæ «Открытая промышленность» хорз фадат дæттынц промышленнон куыстуæтты кадрты резерв баххæст кæнынæн. Нысантæм гæсгæ ахæм профориентацион экскурситæ арæзт цæудзысты æппынæдзухдæр.
