Чысыл аивадуарзджытæ фендзысты ног постановкæтæ, стæй сын рагæй уарзон чи сси, ахæм спектакльтæ дæр
Йæ 87-æм сезон тагъд рæстæг байгом кæндзæн театр «Саби». Чысыл аивадуарзджытæ фендзысты ног постановкæтæ, стæй сын рагæй уарзон чи сси, ахæм спектакльтæ дæр. Бæстондæр хабæрттæ радзурдзæн Чехойты Фатимæ.
Хорздзинады æмæ æвзæрдзинады тох у æнусон, фæлæ йæ хæлæртты сæрыл æдзух чи хæцы, уыцы лæппу, æнæмæнг, фæуæлахиз уыдзæн фыдзонд Раджайыл. Æмæ йæ нæ бахъыгдардзысты нæ хингæнæг сылгоймаг, нæ йæ нысанмæ ныфсджынæй чи цæуы, уыцы фæлитой хилдасæг дæр. Тагъд театр «Саби» байгом кæндзæн йæ 87-æм сезон.
«Саби»-йы сценæйы та ногæй – республикæйы адæмон артист Колыты Владиславы æвæрд постановкæ «Сызгъæрин антилопæ». Артистты дæсныйад та аивадуарзджыты радон хатт бафтаудзæн лæппуйыл мæт кæныныл, стæй хилдасæджы хин митæ æмæ зыд Раджайыл дис кæныныл.
Ног азы бæрæгбонмæ та чысыл аивадуарзджытæн бацæттæ кæндзысты, рагæй сын уарзон чи сси, фæлæ фæстаг рæстæг театры репертуармæ хаст чи нæ уыдис, ахæм спектакльтæ. Гæнæн ис, æмæ уа ног постановкæ дæр.
86-æм театралон сезон «Саби»-йæн хъæздыг уыдис алыхуызон цаутæй. Аивадуарзджытæ сæ зæрдæтæм хæстæг аистой бирæ премьерæтæ. Уыдонимæ Багъраты Иринæйы «Шинель» æмæ Щукины номыл театралон институты рауагъдон Пæррæстаты Владимиры дипломон спектакль «Лебединая песня». Уымæй уæлдай, театр суазæг кодта Сергей Образцовы номыл куклаты Æппæтадæмон скъолайы минæвæртты.
Ног театралон сезон райдайдзæн 12 сентябры.
