Йæ фæллойадон фæндаг райдыдта, 21 азы йыл куы цыди, уæд республикон радиойы фæсивæдон программæты редакторæй
Йе 75 азы юбилей бæрæг кæны журналист, фыссæг æмæ поэт Александр Энглези. Йæ фæллойадон фæндаг райдыдта, 21 азы йыл куы цыди, уæд республикон радиойы фæсивæдон программæты редакторæй. 75 азмæ йын мыхуыры рацыд 26 чиныджы. Йе *рмæджытæ мыхуыргонд цыдысты Мæскуыйы, Санкт-Петербурджы, Ростовы æмæ бæстæйы æндæр горæтты. Сæрмагонд æргом йе сфæлдыстады здахы Райгуырæн бæстæмæ уарзондзинадмæ.
Журналист, фыссæг, поэт, прозаик, бæстæзонæг. Александр Энглезийы сфæлдыстадон фæндаг райдыдта, скъоладзау ма куы уыди, уæд. Йе мкъласон фыста æмдзæвгæтæ, æмæ уымæ гæсгæ. Фæстæдæр Александр сси скъолайы къулыл газеты редактор. Литературæмæ æмæ поэзимæ уарзондзинад æй æрбакодта Цæгат Ирыстоны паддзахадон университеты филологон факультетмæ. Уый каст фæуыны фæстæ, хъуамæ кусынмæ ацыдаид æндæр республикæмæ. Фæлæ йæм фæсидтысты Цæгат Ирыстоны радиокомитеты минæвæрттæ, цæмæй суа литературон равдыстыты редактор. Афтæ 1970-йæм азы райдыдта Александр Энглезийы журналистон архайд.
Александр æмгуыстад кодта алыхуызон мыхуыры фæрæзттмæ – “Северная Осетия”, “Молодой коммунист”… 13 азы та фæкуыста газет “Строитель”-ы. Уыцы азты та ногæй йе ргом аздæхта поэзимæ, æмæ рауагъта йæ фыццаг æмбырдгонд “В ожидание чуда”. Хаст æм æрцыдысты цыбыр новеллæтæ, æмдзæвгæтæ. Чиныджы тираж 2000 экземплярæй фылдæр. Автор арæх æрымысы, йæ бинойнаг æй куыд разæнгард кодта æмдзæвгæтæ фыссынмæ, уый.
Сывæллæттæн æмдзæвгæтæ, новеллæтæ, уацаутæ, радзырдтæ. Æдæппæтæй Александр Энглези ныффыста 26 чиныджы. Бирæтæ балæвар кодта скъолатæн æмæ рæвдауæндæттæн. Йе сфæлдыстады кæддæриддæр уæлдай бынат ахста Фыдыбæстæмæ уарзондзинад. Бирæ чингуытæ æмæ уацтæ ныффыста Цæгат Ирыстоны рæсугъддзинады, йæ æрдзы æмæ зындгонд адæмы тыххæй.
Александр Энглези ма сæмбырд кодта посты къамты стыр коллекци – мин æмæ фондз сæдæйæ фылдæр. Фыссæг йæхæдæг куыд зæгъы, афтæмæй нæ республикæйы у иунæг. Ис дзы стæм экземпляртæ дæр, суанг Уæрæсейы паддзахады заманæй. Уыдис сын сæрмагонд равдыст дæр.
Александрмæ ма фидæнмæ ис бирæ фæндтæ æмæ нысантæ. Фæллад уадзынæн ын рæстæг нæй. Хæстæгдæр рæстæг рухс фендзæн йæ ног чиныг. Баст у Фыдыбæстæйы Стыр хæстимæ. Йе 75 азы юбилейыл дæр фыссæг сæмбæлд фыссæнгæрзтимæ, æмæ йæ арф хъуыдытимæ. Уыдон дæр æнæмæнг фæхæццæ кæндзæн йæ чиныгкæсджытæм.
