Проекты режиссер – Уырысты Аслæнбег
Кинематографийы æппæтуæрæсеон паддзахадон университетæй æрыгон кинематографистты командæ исы киноныв Дзæуджыхъæуы. Проекты режиссер – Уырысты Аслæнбег. Киноныв уыдзæн драмедийы жанры. Хуыйны Олли. У цыбырметражон киноныв. Сфæлдыстадон къорд сæмбырд Мæскуыйы, актерты та æвзæрстой Дзæуджыхъæуы. Бæлвырддæр радзурдзæн Хъайтмазты Дзерассæ.
Сфæлдыстадон къорд æвдисы æппæтæй зынаргъдæр – ист æрмæджы фыццаг кардтæ. Фидæны кинонывы локацитæй иу сси поселок Южный, стæй ма Терчыбылы скейт-фæз дæр. Нывгæнджыты куысты фæрцы сæвзæрд Дзæуджыхъæу хæстæгдæр ивгъуыды. 2 минæм азты райдиан – ивддзинæдты, сæрибардзинады æмæ хип-хопы рæстæг. Ахæм мысæн декорациты æргом кæны къæйных чызг Оллийы æмæ йе ххæст ныхмæвæрд – лæппу Мараты истори.
Афтæ райдыдта режиссер Уырысты Аслæнбеджы дебют. Сæрмагондæй уый курсон куысты хъуыдыйæ рауад стыр проект, кæд æмæ цыбырметражон у, уæддæр. Кинематографийы æппæтуæрæсеон паддзахадон университеты студент – Аслан ахуыр кæны Уæрæсейы адæмон артист Владимир Хотиненкойы æрмадзы. Йæ алыварс æрæмбырд кодта энтузиастты. Бауырныдта сæ, алцыдæр кæй рауайдзæн. Асланæн йæхицæн та у дывæр бæрнондзинад – исы йæ уарзон Ирыстоны. Уый дæр йæхи хъæппæрис у. Йæ фæлтæрддзинады тыххæй йæ фæнды радзурын аивадуарзджытæн.
Сфæлдыстадон къорды хыгъды сты кинематографийы æппæтуæрæсеон паддзахадон университеты студенттæ, актерты та æвзæрстой Дзæуджыхъæуы. Кастингы архайдтой республикæйы театралон æмæ киностудиты чи ахуыр кодта, уыцы фæсивæд. Никколты Викторияйæн ацы куыст кинойы фыццаг у, æмæ уайтагъд сæйраг роль. Куыд зæгъы, афтæмæй йæ хъайтар – чызг Оллиимæ алыхуызон сты, фæлæ уымæй сурæт цымыдисагдæр у. Йæ ныхæстæм гæсгæ, фыццаг фæлтæрддзинад ын ратдзæн, режиссеры куыстимæ базонгæ уæвыны фадат. Уымæн æмæ йæ фидæны фæнды кинонывтæ исын.
Ахæм хатдзæг цæмæй къухы бафта, уымæн цавæр тыхтæ хъæуы, уый зонынц проекты автортæ. Ацы хъуыды царды рауадзынæн фæрæзтæ студенттæ сæхæдæг æмбырд кодтой. 300 мин сомы хæрзчысыл уыдысты, фæлæ сæрмагондæй уыцы æхцайы фæрцы бантыст куыстмæ бавналын. Стыр æххуыс фæцис Ирыстоны уазæгуарзондзинад дæр.
2 къуырийы æнæрлæугæ куыст, хатдзæг та уыдзæн сæрды. Автортæ фæнд кæнынц киноныв «Olly» æвдисын алыхуызон фестивальты. Куыд зæгъынц, афтæмæй йæ æнæмæнг рахæсдзысты ирон аивадуарзджыты размæ дæр.
