Бæрæгбон сбæрæг кодтой студи «Фæндиаджы» дæр
Къуырийы дæргъы нæ республикæйы цæуынц ирон æвзаг æмæ литературæйы боны кадæн мадзæлттæ. Бæрæгбон сбæрæг кодтой студи «Фæндиаджы» дæр. Кæстæртæ аив бакастысты Къостайы æмдзæвгæтæ, акодтой зарджытæ, стæй равдыстой цыбыр театралон инсценирвкæтæ. Сæ бæрæгбонмæ æрбахуыдтой Дзæуджыхъæуы администрацийы сæргълæууæг Милдзыхты Вячеславы æмæ ахуырады Управленийы разамонæг Батырты Асланы. Ацы студийы мадæлон æвзагыл ахуыр кæнынц 30 сывæллоны. Сты, 3 азæй фылдæр кæуыл цæуы, ахæм сабитæ. Сæ фылдæр ардæм æрбацæуынц, иронау иу дзырд дæр не мбаргæйæ æмæ нæ дзургæйæ. Ахуыргæнæндон кусы сæрмагонд системæмæ гæсгæ. Уый æххæст кæнгæйæ, хъуамæ алы сывæллон дæр хъуса ирон æвзаг, уыимæ хъазты хуызы. Афтæмæй æрмæг æнцондæрæй бамбарынц. Студийы директор Габеты Аллæ куыд радзырдта, афтæмæй педагогты сæйраг хæс у – кæстæрты ирон æвзагыл дзурыныл сахуыр кæнын.
