Архайыц дзы 5-æй 10-æм кълæсты онг ахуырдзаутæ
Куырттаты комы йæ куыст кæны бæлвырд наукæты сæрдыгон скъола. Архайыц дзы 5-æй 10-æм кълæсты онг ахуырдзаутæ. Цæмæй сæрдыгон скъолайы архйыны бар райсой, уый тыххæй фæсивæд ацыдысты карз æвзарæн къæпхæн. Ам сæм æнхъæлмæ кæсынц бирæ арф зонындзинæдтæ. Архайдзысты наукон-популярон лекциты, семинарты æмæ фæлварæнты. Æмæ æрмæст уый нæ. Скъоладзауты курдиатæн æмæ арæхстдзинадæн æвдисæн уыди не сфæлдыстадон къорд дæр. Бæлвырддæр радзурдзæн Касаты Наирæ.
Æгæрон цъæх быдырты æмæ фидар хæхбæсты хсæн фæсивæд тырндзысты наукæйы бæрзæндтæм. Куырттаты комы фæсивæдон центр «Барс»-ы байгом сæрдыгон скъола. Республикон программæ «Фæсивæдон политикæйы рæзт»-ы фæлгæты дзы ахуыр кæнынц 2 къабазмæ гæсгæ. Уый – математикæ æмæ информатикæ. 10 боны дæргъы 5-æй 10-æм кълæсты онг ахуырдзаутæ архайдзысты наукон-популярон лекциты, интеллектуалон ерысты, сæхи фæлвардзысты, олимпиадæты чи вæййы, уыцы хæслæвæрттæй.
Ам скъоладзаутæн фадат уыдзæни сæхи æцæг математикон турнирты банкъарынæн. Сæйраг хæрзиуæг та – ног наукон æмвæзадмæ схизын.
Ахуыртæ ацæудзысты, математикæ æмæ информатикæйæ олимпиадæты чи архайдта, стæй дзы чи фæуæлахиз, ахæм фæсивæд. Ацы фæлварæнты хатдзæгтæм гæсгæ та чызджытæн æмæ лæппутæн фадат уыдзæни æппæтуæрæсеон æмæ æппæтадæмон турнирты архайынæн.
Ахуырадон программæтæй уæлдай ма сæрдыгон скъолайы архайджытæн бацæттæ кæндзысты алыхуызон балцытæ æмæ экскурситæ. Цæгат Ирыстоны рæсугъддæр бынæттæ фæсивæды ноджыдæр сразæнгард кæндзысты сфæлдыстадон уæлахизтæм.
Ацы аз сæрдыгон скъолайы ахуыр кæны 33 адæймаджы. Сæ кармæ гæсгæ сын скодтой хицæн къордтæ, æмæ алкæмæн дæр бацæттæ кодтой индивидуалон программæ. Кæстæр æмæ астæуккаг курсытæ ахуыр кæнынц программæтæ аразыны бындуртыл. Хистæртæ та сæхи цæттæ кæнынц олимпиадæты архайынмæ. Ахуыргæнджыты хсæн – паддзахадон уæлдæр ахуыргæнæндæтты кусджытæ, физикон-математикон наукæты кандидаттæ æмæ хистæр ахуыргæнджытæ, стæй сæхи олимпиадæты æмæ конкурсты хорз чи равдыста, ахæм æрыгон специалисттæ.
28-æм сæрдыгон скъола у уникалон. Фыццаг хатт арæзт цæуы олимпаг æмбырдты форматы. 18 азы дæргъы скъола рауагъта бирæ курдиатджын фæлтæртæ. Гæнæн ис, æмæ дзы бирæтæ сæ цард наукæимæ не сбæтдзысты, фæлæ ам сы рæстæг арвыстой, уый сын æнæмæнг пайда кæй уыдзæн, уый бæлвырд у.
