Труппæ сценæмæ рахаста Владимир Железняковы зындгонд уацау «Чучело»
Мæздæджы адæмон театрæн ацы аз райдыдта премьерæйæ. Труппæ сценæмæ рахаста Владимир Железняковы зындгонд уацау «Чучело». Ныхас цæуы гыццыл чызджы хъысмæтыл. Бæлвырддæр та – кæцыдæр рæстæг иунæгæй æнæхъæн дунейы ныхмæ куыд слæууы, ууыл. Пьесæ ирдæй æргом кæны адæмы хсæн ахастдзинæдты фарстатæ: алы кары фæзилæнтæ, фыццаг уарзондзинад æмæ афтæ дарддæр. Уыцы æнкъарæнтæ ныртæккæ дæр сæ ахадындзинад нæ сафынц скъоладзауты хсæн. Ролан Быковы хъуыстгонд киноныв экрантæм рацыд 50 азы размæ. Фæлæ рæзгæ фæлтæры фарстатæ къаддæр нæ кæнынц. Уый нæ, фæлæ ма уацмысы цы ныхмæлæуддзинад равзæрд, уый ныртæккæ дæр, рæстæгæй-рæстæгмæ фæзыны сывæллæтты коллективы. Пьесæйы сæ курдиат раргом кодтой куыд æнахъом сывæллæттæ, афтæ хситæр кары хæдахуыр артисттæ дæр. Уæдæ спектакль аивадуарзджыты зæрдæмæ кæй фæцыд, уый бæрæг дæр бæрæг дардта. Драмон историйы кæрон се ппæт дæр зæрдиагæй цин кодтой. Зæгъдзыстæм ма уый дæр, æмæ премьерон спектакль уыд хæрзаудæн. Цы фæрæзтæ æрæмбырд кодтой, уыдоны хай арвитдзысты сæрмагонд æфсæддон операцийы архайджытæн.
