Цы проекттæ йæм бахастой, уыдонæй сæрмагонд къамис равзæрста, социалон ахадындзинад кæмæн ис, стæй цардархайды фыццаградонтыл нымад чи у, ахæмтæ
Мæздæджы районы администрацийы арæзт æрцыд инвестицион проектты конкурс. Цы проекттæ йæм бахастой, уыдонæй сæрмагонд къамис равзæрста, социалон ахадындзинад кæмæн ис, стæй цардархайды фыццаградонтыл нымад чи у, ахæмтæ. Субсидитæ райстой чысыл бизнесы æртæ минæвары. Зæгъæм, тротуарон плиткæ æмæ бетонæй æрмæг аразæг куыстуат заказ скодта ног кусæнгæрзтæ. Уый сын фадат ратдзæн сæ архайд фæрæвздзæр кæнынæн, стæй ма уæлæмхасæн куысты бынæттæ скæнынæн дæр. Скъола «Альтернатива»-йы та бакуыстой сæрмагонд бизнес-пъланыл. Уый фæрцы ахуыр кæндзысты хæрзчысыл сабиты дæр. Ног куысты хуызæн равзæрстой Мария Монтессорийы зындгонд методикæ. Медицинон центр та субсидиты руаджы самал кæндзæн æмбæлгæ диагностикон кусæнгæрзтæ. Мæздæджы районы амалхъомдзинады хайады куыд фехъусын кодтой, афтæмæй инвестицион проекттæн æдæппæтæй радих кодтой милуан æмæ 500 мин сомы. Алы аз дæр фæрæзты бæрц нысан кæнынц фылдæр кæнын, нæ бæстæйы экономикон уавæр æмæ индексаци хынцгæйæ.
