Уый тыххæй аппаратон æмбырды фехъусын кодта республикæйы æнæниздзинахъахъхъæнынады министр Тебиаты Сослан
Мæздæджы районы арæзт æрцæудзæн 3 фельдшерон-акушерон пункты. Уый тыххæй аппаратон æмбырды фехъусын кодта республикæйы æнæниздзинахъахъхъæнынады министр Тебиаты Сослан. Инженерон хызтæм баиу кæнынæн уæлæмхасæн радих кодтой 7 милуан сомы. Республикæйы Сæргълæууæг Сергей Меняйло бахæс кодта фидæны медицинон объектты арæзтадæн зæххы хæйттæ дих кæныны фарстамæ бæрнон цæст дарын. Æмбырды ныхас цыди Ногиры æмæ Михайловскæйы хсæн хиды арæзтадыл дæр. Транспорты æмæ фæндаггон инфраструктурæйы комитеты сæрдар Солиты Тариэль куыд фæнысан кодта, афтæмæй проектон-сметон документаци цæттæ кæнынц декабрьмæ. Сергей Меняйло куыд фæнысан кодта, афтæмæй объектæн йæ кæронбæттæн аргъ хъæуы бæлвырдæй базонын, цæмæй 2024-æм 25-æм азты бюджетмæ хаст æрцæуа, уый тыххæй. Сæргълæууæг ма сæрмагонд хæстæ радта, Запорожьейы облæсты Черниговы районæн баххуыс кæныны тыххæй. Цæгат Ирыстон йæхимæ райста уыцы районæн æххуыс кæныны хæс. Цæрæнуæтты-коммуналон хæдзарады министрад та кусдзæн хъармгæнæн сезонмæ цæттæ кæныныл. Ахуырад æмæ культурæйы министрадтæ та хъуамæ бакусой ног ахуыры азмæ чингуытæй сифтонг кæныны фарстайыл. Профилон министрадæн ма бабар кодтой цæугæ медицинон комплекс бадæттынæн æмбæлгæ мадзæлттæ баххæст кæнын дæр.
