Хореограф – театры сæйраг балетмейстер Суанты Валерий
Мариинаг театры дзæуджыхъæуккаг филиалы арæзт æрцыд егъау аивадон мадзал – балет «Граф Монте-Кристо»-йы премьерæ. Режиссер – Елена Мариниченко. Хореограф – театры сæйраг балетмейстер Суанты Валерий. Александр Дюмайы æнæмæлгæ роман фыццаг хатт фенæн уыд кафты хуызы. Чехойты Фатимæйæн ныхасы бар.
Францусаг драматург Александр Дюмайы роман – хъысмæттæ ивæг аивад. Ахæм у постановкæ дæр. Буары *взагæй премьерæйы размæ равдысты бамбарæн уыд, ныхæстæй зæгъæн цæмæн нæй, уый. Солист Малиты Азæмæты хъуыдымæ гæсгæ, йæ хъайтары зæрдæйы цы тыхджын æнкъарæнтæ ис, уыдон сценæйы æнæ равдисгæ нæ уыд.
Сæйраг балеринæ Виолетта Магомедханова куыд фæбæрæг кодта, уымæ гæсгæ йæ зæрдæмæ хæстæг айста сæйраг хъайтар МерсЕдесы сурæт, цымыдисаг ын уыд уыцы ролыл бакусын.
Балеты режиссер-æвæрæг у Елена Мариниченко. Уый Мариинаг театры филиалимæ æмгуыстад кæны бирæ азты. Йæ разамындæй сæвæрдтой постановкæтæ «Дюймовочка», «Маугли», «Алиса в стране чудес»… Афæдзы размæ Дзæуджыхъæумæ цæуынвæнд куы скодта, уæд йæ зæрдæйы сæвзæрд хъуыды роман «Монте-Кристо»-йыл балеты хуызы бакусын. Уæд уыд æмбæрстгонд – культурон ногдзинад домдзæн лæмбынæг цæстдард. Зæгъæм, йæ музыкæ. Инструменталон уацмысты автор у францусаг композитор Эдуард Лалло.
Балетæн сæрмагонд улæфт балæвар кодта дирижер Игорь Томашевский. Уый равзæрста стæм фæзынд – скрипкæйы концерт. «Испайнаг симфони» азæлыд тæрхоны кæрон. Дирижермæ равзæрст уацмыстæ фыццаг фæкастысты æгæр уæлмонц, фæлæ йæ дызæрдыг хъуыдытæ уайтагъд фæцыдæр сты.
Постановкæйы æддаг бакаст у нывгæнджытæ Найфонты Давид æмæ София Эль-МансУрийы куыст. Сæ курдиаты руаджы балет аивадуарзджытæ сæ зæрдыл дардзысты бирæ рæстæг. Денджызон балц равдыстой æрмæст декорацитæй нæ. Балеринæты аив змæлд уыд фæлмæн уылæнты æнгæс.
Денджызон тыгъдадыл балц равдисынæн æххуыс уыд анимаци дæр. Мариинаг театры филиалæн ахæм фæлтæрд у фыццаг. Бакуыста йыл нывгæнæг София Эль-МансУри. Анимацийы бындуры – аразгæ интеллекты руаджы чи райгас вæййы, йæ конд ахæм нывтæ.
Постановкæйы хорегорафи у авторон. Бакуыстой йыл театры сæйраг балетмейстер Суанты Влерий æмæ режиссер-æвæрæг Елена Мариниченко. Алы змæлд дæр – хъайтарты ног æнкъарæн. æмæ цавæрфæнды кæд уыд – æхсызгон кæнæ трагикон, уæддæр уыд уадиссаг.
Дæргъвæтин куыст кæронмæ æрхæццæ. Фæци рæдыдтытæм æркаст. æмæ «Граф Монте-Кристо» театрдзауты раз фæзынд цæхæртæ калгæ премьерæйы хуызы.
