Равдыстой легендарон балет «Граф Монте Кристо»
Мариинаг театры филиал Дзæуджыхъæуы байгом кодта йæ 10-æм сезон. Равдыстой легендарон балет «Граф Монте Кристо». Ацы истори ирдæй æвдсыт æрцыд театралон сценæйы. Постановкæйы архайынц куыд ног, афтæ раззагдæр солисттæ. Куыд ацыд премьерæ, уый тыххæй радзурдзæн Чехойты Фатимæ.
Алы сезон дæр Мариинаг театры дзæуджыхъæуккаг сценæйы — раст цыма республикæйы ног культурон азы райдиан у, афтæ. Филиал æдзух равзары дунеон уæлвæзады репертуар. Ацы сезон дæр иннæтæй нæ хицæн кæндзæн. Райдыдта балет «Граф Монте-Кристо»-йы премьерæйæ. Театрæн æрмæст постановкæ равдисыны фадат нæу, фæлæ труппæйы ноггонд фæрæзтæй спайда кæныны дæр.
Литературон классикæ балетон сценæмæ рахæссын хуымæтæг хæс нæу. Цыбыр рæстæгмæ бахъуыд бацæттæ кæнын зындгонд пластикон драматурги, уыимæ сюжеты сæйраг хъуыды — Эдмон Дантесы трагедийæ Парижмæ йе *рыздæхыны онг сусæг графы хуызы, нæ фесафгæйæ.
Театрдзаутæн уæлдай цымыдисаг сты сæйраг партитæ саразджытæ. Ацы сезоны Филиалы коллективы фæзындысты, бæстæйы хуыздæр сценæты куысты фæлтæрддзинад кæмæ ис, ахæм ног солисттæ. Се *хсæн — прима-балерина Ирина Перрен, Санкт-Петербурджы Михайловы театры солисткæ. Бæрзонд уæлвæзады академион скъола, техникæ æмæ дунеон сценæты куысты фæлтæрддзинад ын — æххуыс йæ хъайтары лыстæг хицæндзинæдтæ равдисынæн.
Постановкæйы бæрзонд уæлвæзад — æнæхъæн коллективы æнгом куысты хатдзæг. Симфонион оркестр æмæ балетон труппæ æмархайд кæнынц, алы эмоционалон змæлд дæр партитурæйы зæлынадимæ кæм баиу вæййы, уыцы сценæйы. Сезон ахæм премьерæйæ кæй райдыдта, уый ма иу хатт фæбæлвырд кодта: Мариинаг театры Дзæуджыхъæуккаг филиал рагæй нал у хуымæтæг регионалон фæз, сси, хуыздæр артистты бæстæйы алы рæттæй йæхимæ чи лвасы æмæ театрдзаутæн æцæг стыр аивад чи лæвар кæны, Кавказы ахæм культурон центр. Оркестр бамынæг æмæ иу уысмы фæстæ залы сабырдзинад фехæлдта тыхджын къухæмдзæгъд. Театрдзауты фыццаг æнкъарæнтæ — æппæтæй рæстдзæвиндæр.
Сезон байгом. Мариинаджы афишæ хъуамæ уа алывæрсыг. Фæлæ коллективы историйы ног сыф байгом балет «Граф Монте-Кисто»-йæ.
