Нæлгоймаг сæрмагонд æфсæддон операцийы зонæмæ арвыста 12 камазы гуманитарон æххуысимæ, йæ хотæ та алы хатт хæстонтæн арвитынц сæхи конд чъиритæ
Ногхъæуы сæрмагонд майданæй схорзæхджын кодтой волонтер, меценат Голоты Русланы. Нæлгоймаг сæрмагонд æфсæддон операцийы зонæмæ арвыста 12 камазы гуманитарон æххуысимæ, йæ хотæ та алы хатт хæстонтæн арвитынц сæхи конд чъиритæ. Ацы хъуыддаг дарддæр дæр æххæст кæндзысты. Бæлвырддæр радзурдзæн Хъайтмазты Дзерассæ.
Сæрмагонд æфсæддон операцийы фыццаг бонтæй фæстæмæ Ногхъæуы цæрæг Голоты Руслан æдзухдæр арвиты гуманитарон æххуыс хæстонтæн. Куыд зæгъы, афтæмæй фæнд кодта фронтмæ бархионæй ацæуын, фæлæ йын йæ кармæ гæсгæ бар нæ радтой. Русланмæ ис хæстон фæлтæрддзинад. Æфсæддонты уавæр хорз æмбары.
2 азмæ Голоты Руслан сæрмагонд æфсæддон операцийы зонæмæ арвыста 12 КАМАЗы гуманитарон æххуысимæ – хойрæгтæ, уæлæдарæс, хи хсынæн фæрæзтæ, стæй арæзтадон æрмæджытæ. Ацы хъуыддаджы йын æххуыс кæнынц йе *ртæ хойы. Фыцынц чъиритæ æмæ архайынц гуманитарон æххуыс æмбырд кæныны. Руслан йæхи тыххæй æфсæрмдзастæй фæдзуры, ацы хъуыддаг къухы кæй æфты хъæуы алы цæрæджы фæрцы.
Руслан гуманитарон æххуыс сæрмагонд операцийы зонæмæ йæхæдæг бахæццæ кæны. 58-æм æфсады æмæ хæстонты ныййарджыты комитеты минæвæрттимæ иумæ йæ бацæттæ кæнынц. Хæстонтæн ахæм æрхъуыдыдзинад æхсызгон вæййы.
Голоты Русланы ахадгæ архайдæн аргъ скодтой. Ногхъæуы культурæйы хæдзары йын 58-æм æфсады минæвæрттæ радтой майдан «Тыл – фронту». Бузныджы фыстæджытæ саккаг кодтой йæ хотæн дæр.
Алагиры районы администрацийы минæвæрттæ куыд загътой, афтæмæй гуманитарон æххуыс æмбырд кæныны бирæ цæрджытæ архайынц. Ацы хъуыддагмæ се вæрæн хæссынц ахуыргæнæндæттæ, æхсæнадон æмæ коммерцион организацитæ. Ахæм куыст цæуы сæрмагонд æфсæддон операцийы фыццаг бонтæй.
Ныртæккæ Руслан цæттæ кæны гуманитарон æххуысы ног парти. Хæстонтæм бахæццæ уыдзæн 9-æм маймæ.
