Экспозици адæмы зонгæ кæны не мзæххон хъæбатыры хæстон фæндагимæ, райдай рæнхъон салдатæй æмæ æфсады инæларæй фæуы
Плиты Иссæйы хæдзар-музейы Дзæуджыхъæуы байгом равдыст «Салдат. Æфсæддон разамонæг. Хъæбатыр». Экспозици адæмы зонгæ кæны не мзæххон хъæбатыры хæстон фæндагимæ, райдай рæнхъон салдатæй æмæ æфсады инæларæй фæуы.Фыдыбæстæйы Стыр хæсты темæ, бæлвырддæр та – бæхылбадджыты æфсæдты 1-аг къорды командæгæнæг Плиты Иссæйы ахадындзинад Уæлахизы. Равдысты фенæн ис, абарæн кæмæн нæй, ахæм экспонаттæ æмæ фондты коллекцитæ. Фыдыбæстæйы Стыр хæсты æфсæддон разамонджыты ирд хыгъды, Уæрæсейы æмæ Ирыстоны ныфсхаст хъайтары, Советон Цæдисы дыууæ хатты, æмæ Монголийы Адæмон республикæйы хъæбатыр, æфсады инæлар Плиты Иссæйы ном ахсы зынгæ бынат. Йе фсæддон сгуыхтдзинæдтæ, йæ цардвæндаг ирд дæнцæг сты йæ Фыдыбæстæйæн æмæ фсæддон хæсæн æгæрон лæггадæн. Уымæй дарддæр – йе мбæстон адæмæн, патриотизмæн æмæ интернационалон ахастдзинæдтæн.
