Ахæм ательеты цæттæ кæнынц, социалон нысаниуæг кæмæн ис, ахæм куыстуæттæн дзаумæттæ, кадеттæн хуыйынц парадон формæ
Профессионалон ахуырады райрæзтмæ гæсгæ республикæйы кусы 6 ахуырадон-кондадон æрмадзы. Ахæм ательеты цæттæ кæнынц, социалон нысаниуæг кæмæн ис, ахæм куыстуæттæн дзаумæттæ, кадеттæн хуыйынц парадон формæ. Нырыккон ифтонггæрзты фæрцы куыст цæуы тагъддæр æмæ æнцондæрæй. Бæлвырддæр радзурдзæн Хъайтмазты Дзерассæ.
Лæмбынæг цæстæнгас, къухты рог змæлд, техникæимæ арæхстджын куыст – æмæ тæнæг æндæхтæ баиу вæййынц, æнæхъæн фæлгонц аразгæйæ. Хуыйæн хъуыддаг æцæг аивад у, æмæ йыл сахуыр кæнын афтæ æнцон нæу. Сæйрагдæр у фæразондзинад æмæ дыл цы бæрнондзинад æвæрд ис, уый æмбарынад. Уæлдайдæр та хуымæтæг уæлæдарæс нæ, фæлæ парадон æфсæддон формæ куы цæттæ кæнай, уæд.
2 азы размæ дæр ма ам ахæм ифтонггæрзтæ нæ уыд. Зæронд техникæ кусгæйæ ахæм хъæр кодта, æмæ-иу ахуыргæнæджы ныхас нæ хъуыст. Ныр чызджытæн ног кусæнгæрзтимæ архайын у æнцон. Лицейы ахуырдзаутæ куыд зæгъынц, афтæмæй сæ фæрцы фæллой кæнынмæ тынгдæр тырнынц.
Фæлæ цæмæй хъуыддаг размæ цæуа, уымæн æрмæст кусæнгæрзтæ фаг нæу. Ахсджиаг сты зонындзинæдтæ æмæ фæлтæрддзинад. Ныр уымæй дæр чызджытæ æххæст сты. Фыццаг уыдис зын, ныр иу китель сцæттæ кæныныл бирæ рæстæг æмæ тыхтæ нæ хардз кæнынц.
Профессионалон лицейы ахуырдзаутæ æрмæст кадетон формæ нæ хуыйынц. Социалон нысаниуæг кæмæн ис, ахæм кусæнуæттæн цæттæ кæнынц хъæугæ дзаумæттæ.
Ахуырадон-кондадон æрмадзтæ арæзт æрцыдысты профессионалон ахуырады райрæзтмæ гæсгæ. Архайынц республикæйы 6 ахуыргæнæндоны. Сæ сæйрагдæр нысан у, цæмæй колледжтæй æмæ училищæтæй рацæуой, æцæгдæр кусын чи зоны, ахæм рауагъдонтæ.
Фæллойадон чиныг, мызд æмæ, фидæны æнæмæнг чи бахъæудзæн, ахæм фæлтæрддзинад. Уый фæсивæдæн ратдзæн, хорз куыст ссарыны фадат.
