Специалисттæ ма кæнынц реставрацион куыст дæр
Республикæйы архайы рагон музыкалон инструменттæ цæттæ кæныны проект. Азæй-азмæ кæны парахатдæр. Специалисттæ ма кæнынц реставрацион куыст дæр. Фæлæ уыцы инструменттыл се ппæты бон цæгъдын нæу. Оркестр «Фыдæлты намыс» у, рагон музыкалон традицитæ сног кæныныл чи архайы, ахæм къорд. Бæлвырддæр радзурдзæн Хъайтмазты Дзерассæ.
Музыкалон инструмент цæмæй раст зæла, уый тыххæй хъæуы бындуронæй бацархайын. Ацы хъуыддаг гæнæн ис æмæ бацахса цалдæр сахаты. Алы лыстæг хай дæр ахсджиаг у. Ацы къабазы специалисттæ бирæ не сты. Дзæуджыхъæуы ис национ музыкалон инструменттæ кæм цæттæ кæнынц, ахæм уникалон куыстуат. Архайы 30 азæй фылдæр.
Куыстуаты кæнынц реставраци дæр. Уый у лæмбынæг куыст, уымæн æмæ хъæуы хæлд элемент баивын, чи кусы, уыцы хæйттæ ма бахъыгдаргæйæ.
Ужегаты Тамерлан куыд зæгъы, афтæмæй æппæтæй тынгдæр агурынц национ кавказаг фæндыр. Фæлæ уыимæ куыстуаты цæттæ кæнынц рагон музыкалон инструменттæ – хъырнæг æмæ хъисын фæндыртæ.
Хъисын-фæндырыл цæгъдын чи зоны, уыдонæй иу у республикæйы культурæйы сгуыхт кусæг Джихаты Роман. Разамынд дæтты, национ музыкæйы оркестр «Фыдæлты намыс»-æн. Йæ хыгъды ис 18 музыканты.
Сфæлдыстадон къорд йæ арæхстдзинад æвдисы республикæйæ дарддæр. 2 хатты уыд æппæтуæрæсеон фестиваль «От Волги до Дона»-йы. Джихаты Роман куыд зæгъы, афтæмæй оркестры сæйраг хæс у ирон культурæ парахат кæнын.
